दमौली । सम्पूर्ण विश्व कोरोना महामारीले ग्रसित भइरहेका बेला सरकारले मिलेनियम च्यालेन्ज कर्पोरेसन (एमसीसी) पारित गर्न थालेको भन्दै तनहुँका पाँच राजनीतिक दलहरूले प्रमुख जिल्ला अधिकारी मार्फत् प्रतिनिधि सभाका सभामुखलाई ज्ञापनपत्र पठाएका छन् ।

२०७७ असार ७ गते बुझाइएको उक्त ज्ञापनमा यसअघि भारतसित १९५० को शान्ति तथा मैत्री सन्धि, कोशी, गण्डकी, महाकारी सम्झौता, बिप्पा सम्झौताजस्ता असमान सन्धिसम्झौता भइसकेको परिस्थितिमा अहिले फेरि एमसीसी पारित गर्न खोजिएकोमा सरकारको ध्यानाकर्षण गराइएको छ । एमसिसीलाई व्यवस्थापिका–संसदको कार्यसूचीबाट हटाउन माग गर्दै ज्ञापनमा सम्पूर्ण प्रतिनिधि सभा तथा राष्ट्रियसभाका सांसदलाई एमसिसी खारेज गरेर नेपालको राष्ट्रिय स्वाधीनताको पक्षमा उभिन आग्रह गरिएको छ ।

ज्ञापनपत्रमा नेकपा (मसाल) तनहुँका प्रवक्ता भरत केसी, नेकपा (क्रान्तिकारी–माओवादी) तनहुँका सेक्रेटरी नारायण लम्साल, राष्ट्रिय जनमोर्चा तनहुँका अध्यक्ष पुष्पलाल श्रेष्ठ, देशभक्त जनगणतान्त्रिक मोर्चा तनहुँका बेनिबहादुर थापा र नेकपा (माले) तनहुँका का.वा. सेक्रेटरी नरबहादुर रानाभाटको हस्ताक्षर रहेको छ ।

कोरोना व्यवस्थापनबारे पनि ज्ञापन

त्यसैगरी पाँच दलले तनहुँमा कोरोना भाइरसको सङ्क्रमण नियन्त्रणबारे जिल्ला प्रशासनको ध्यानाकर्षण गराउँदै पनि अर्को ज्ञापनपत्र बुझाएका छन् । ज्ञापनमा स्थानीय तहका क्वारेन्टाइनको व्यवस्थापन व्यवस्थित नभएको, परीक्षण प्रतिवेदन समयमै प्राप्त नभएको र क्वारेन्टाइनभन्दा बाहिरका जनताको उपचारमा ध्यान नपुगेकोजस्ता विषय उल्लेख गरिएको छ । उनीहरूले क्वारेन्टाइनको उचित व्यवस्थापन गर्न र सबै स्थानीय तहमा सुविधासहितको आइसोलेसन बेड तयार पार्न जिल्ला प्रशासनसित आग्रह गरिएको छ ।

दुवैथरि ज्ञापनपत्र बुझाइसकेपछि पाँच दलले अनसन चोकमा कोणसभा सम्पन्न गरेका थिए । कोणसभालाई राजमो तनहुँका अध्यक्ष पुष्पलाल श्रेष्ठ र देशभक्त जनगणतान्त्रिक मोर्चाका नेत्रबहादुर रानाभाटले सम्बोधन गर्नुभएको थियो । कार्यक्रमको सञ्चालन राजमोका धनबहादुर परियारले गर्नुभएको थियो ।