काठमाडौँ । वरिष्ठ नेत्ररोग विशेषज्ञ डा सन्दुक रुइतले राजनीतिमा प्रवेश गर्ने सम्भावना नरहेको बताउनुभएको छ ।
२०८२ भदौ ३० गते सोमबार प्रेसविज्ञप्ति जारी गरी उहाँले जेनजी आन्दोलनपछि बनेको अन्तरिम सरकारमा मन्त्री बन्ने चर्चा हल्ला मात्र भएको बताउनुभएको हो ।
डा रुइतले लामो चिकित्सकीय यात्रामा साथ दिँदै आएका नेपालीबाट भविष्यमा पनि सद्भाव, साथ र माया पाइरहने विश्वास व्यक्त गर्नुभयो ।
“मलाई प्रत्येक राजनीतिक उथलपुथलपछि कुनै न कुनै पदमा बसेर नेतृत्व गर्न आग्रह आउने गरेको छ तर म स्पष्ट छु, मेरो कर्म भनेको नेपाली र संसारभरका बिरामीलाई आफ्नो सिप, ज्ञान र समय दिएर सेवा गर्नु हो” विज्ञप्तिमा भनिएको छ ।
डा रुइतले सबै नागरिकले आआफ्नो पेसा, कर्म र व्यवसायमा इमानदारीपूर्वक लागे मुलुकको अवस्था परिवर्तन गर्न धेरै समय नलाग्ने बताउनुभयो ।
आफू निरन्तर चिकित्सकीय पेसामार्फत नागरिक सेवामा तल्लीन रहने उहाँको भनाइ छ ।
