दाङ । राष्ट्रिय जनमोर्चा दाङले “कोरोनाको वर्तमान स्टेज र नागरिकको दैनिक जीवन” विषयक अन्तरसंवाद कार्यक्रम सम्पन्न गरेको छ । स्वास्थ्य तथा जनसङ्ख्या मन्त्रालयका गुणस्तर मापन महाशाखाका प्रमुख डा. विकास देवकोटाको प्रमुख आतिथ्यतामा सो कार्यक्रम २०७७ असार ६ गते भर्चुअल माध्यमबाट सम्पन्न भएको हो ।
कार्यक्रममा मन्तव्य राख्दै प्रमुख अतिथि डा. विकास देवकोटाले कोरोना भाइरसबाट जोगिने भनेकै भ्याक्सिनबाट भएको बताउनुभयो । उहाँले भ्याक्सिनबेगर कोरोनाबाट मुक्त हुन नसकिने दावी गर्नुभयो । सङ्क्रमणबाट जोगिनका लागि उच्च सतर्कता अपनाउन जरुरी रहेको बताउँदै उहाँले विश्वव्यापी रूपमा यो भाइरसले आतङ्क सृजना गरेको बताउनुभयो ।
लकडाउन आन्दोलनमा बन्द गरेकोजस्तो होइन भन्दै डा. देवकोटाले अगाडि भन्नुभयो– ‘व्यक्तिव्यक्तिबिचको दूरी मेन्टेन गर्न सक्ने हो भने बजार, व्यवसाय, यातायात बन्द नगरे पनि हुन्छ । तर आम नागरिकले त्यसो गर्न नसक्ने भएकाले लकडाउन गर्नुपरेको हो ।’ उहाँले अहिलेसम्म सङ्क्रमण समुदायमा पुगिनसकेको बताउँदै कन्ट्रयाक ट्रेसिङ र शङ्कास्पद व्यक्तिलाई परीक्षण गर्न ढिलो गर्न नहुने बताउनुभयो ।
मन्त्रालयबाट काम गर्दा कतिपय प्राविधिक समस्याले समयमा काम हुन नसके पनि मन्त्रालय तदारुकताका साथ काम गरेको र कामले गति पनि लिएको दावी उहाँले गर्नुभयो । उहाँले थप्नुभयो– ‘हामी हतोत्साहित नबनेर सबैको एकताका साथ लिएर कामलाई अगाडि बढाउनुपर्छ । अझै सबै सचेत नागरिकले स्वतःस्फूर्त रूपमा हातोमालो गरेर अगाडि बढ्नुपर्छ ।’
राजमो दाङका अध्यक्ष गणेश आचार्यको सहजीकरणमा सम्पन्न उक्त कार्यक्रममा सहभागीहरूले विभिन्न जिज्ञासा राख्नुभएकोे थियोे । त्यसको जवाफ पनि डा. देबकोटाले दिनु भएको थियोे । कार्यक्रममा दाङ जिल्ला उद्योग–वाणिज्य सङ्घका अध्यक्ष नारायण भुसालले पनि मन्तव्य राख्नुभएको थियो ।
