बेइजिङ । अमेरिकी राष्ट्रपति डोनाल्ड ट्रम्पले युक्रेनमा जारी युद्धलाई लिएर युरोपेली मुलुकहरूसँग चीनमाथि आर्थिक दबाब सिर्जना गर्न आग्रह गर्नुभएको छ।
बेइजिङले चीनमाथि आर्थिक दबाब सिर्जना गर्ने आह्वानको ‘कडा विरोध’ गर्ने शुक्रबार जनाएको छ।
चीनले कहिल्यै पनि रुसको युद्धको निन्दा गरेको छैन र न त रूसलाई युक्रेनबाट उसका सेना फिर्ता बोलाउन आह्वान गरेको छ । युक्रेनका धेरै सहयोगीहरूले बेइजिङले मस्कोलाई युक्रेन युद्धमा समर्थन प्रदान गरेको बुझाइ छ।
चीनले आफू तटस्थ पार्टी भएको बताउँदै आएको छ र नियमित रूपमा युद्ध अन्त्यका लागि आह्वान गर्दै आएको छ भने पश्चिमी देशहरूले युक्रेनलाई हतियार दिएर द्वन्द्व लम्ब्याउन खोजेको आरोप पनि लगाउँदै आएको छ ।
“बिहीबार पेरिसमा भेला भएका युरोपेली नेताहरूसँग भिडियो कन्फरेन्समार्फत सम्बोधन गर्दै अमेरिकी राष्ट्रपति ट्रम्पले उनीहरूलाई चीनमाथि दबाब दिन आग्रह गर्नुभएको र युरोपले युद्धका लागि आर्थिक सहयोग गर्ने रुसी तेल खरिद बन्द गर्नुपर्ने बताउनुभएको थियो,” ह्वाइट हाउसका एक वरिष्ठ अधिकारीले नाम नबताउने शर्तमा एएफपीसँग बताउनुभयो ।
ट्रम्पको टिप्पणीबारे शुक्रबार सोधिएको प्रश्नमा चीनको विदेश मन्त्रालयले बेइजिङ ‘न त यो (युक्रेन) सङ्कटको निर्माता हो न त यसको पक्षधर नै हो’ भनेको छ ।
प्रवक्ता गुओ जियाकुनले एक पत्रकार सम्मेलनमा भन्नुभयो, “हामी चीनलाई यस मामिलामा निरन्तर तान्ने अभ्यासको दृढतापूर्वक विरोध गर्दछौं र चीनमाथि तथाकथित आर्थिक दबाब थोपरिएमा कडा विरोध गर्दछौँ।”
भ्लादिमिर पुटिनले फेब्रुअरी २०२२ मा रुसको युक्रेन आक्रमणको आदेश दिनुभन्दा केही समयअघि मस्को र बेइजिङले ‘नो लिमिट पार्टनरसिप’ को घोषणा गरेका थिए।
दोस्रो विश्वयुद्ध समाप्त भएको ८० वर्ष पुगेको उपलक्ष्यमा बुधबार आयोजित विशाल सैन्य परेडमा चीनका राष्ट्रपति सी जिनपिङ, रूसी नेता पुटिन र उत्तर कोरियाली नेता किम जोङ उन सँगै उभिएका थिए ।
यसलाई बेइजिङले ‘शान्तिप्रिय देश र जनतासँग मिलेर इतिहासलाई स्मरण गर्ने’ उद्देश्यले ‘विदेशी पाहुनाहरुलाई निमन्त्रणा गरेको’ बताएको छ ।
पुटिनको नेतृत्वमा रहेको वर्तमान् रुसलाई चीनले ‘शान्तिप्रिय देश’ मान्छ कि मान्दैन भन्ने प्रश्न शुक्रबार एक पत्रकारले दुई पटक सोध्दा प्रवक्ता गुओले सोझै जवाफ दिन अस्वीकार गर्नुभयो ।
चिनियाँ राष्ट्रपति सीसँग बेइजिङमा आयोजित विशाल सैन्य प्रदर्शनमा भाग लिएका पुटिनले युक्रेनमा आफ्नो सेनाको प्रगतिको प्रशंसा गर्दै रुसी सेना ‘सबै मोर्चामा’ अघि बढिरहेको बताउनुभएको थियो ।
