हेमलाल गौतम, सचिव, जापान नेपाली एकता समाज ##

‘युगदर्शन’ साप्ताहिकको प्रकाशन २०७६ भदौ १८ गतेदेखि सुरु भएर २०८२ सम्म आउँदा सात बसन्त पार गरिसकेछ । त्यो बेलाको प्रकाशनको दुःखको घडीमा जापानले पनि खम्बा बनेर यसलाई जगहाल्न प्रयत्न गरेको स्मरण गर्न चाहन्छु । त्यसको सारथी संस्थागत रूपमा आफू पनि बन्न पाएकोमा खुसी लाग्छ ।

त्यसपछि पनि हरेक वर्ष त्यसको विकास र विस्तारका लागि नियमित सहयोग गरिरहन्छौँ । यो दुःखको कुरा हो कि जनताको आवाज बोल्ने पत्रिका या प्रकाशनलाई व्यवस्थापनले अझै आत्मनिर्भर बनाउन सकेको छैन । यो आलोचना गर्ने हिम्मत राख्न पाउनु प्रत्येक सहयोगी र शुभचिन्तकको अधिकार हो । अब यो वर्षदेखि आफ्ना विगतका कमीकमजोरी हटाई अलिकति दीर्घकालीन स्थायित्व कायम गर्न सकोस् । अझै सशक्त र निस्पक्ष मिडिया बन्न सकोस् ।

प्रुफरिडिङमा कन्जुस्याइ नगरियोस् । प्रत्येक शुभचिन्तकले पनि अझै प्रचारप्रसार गर्दै जान सकुन । पत्रिका पढ्दा सररर समुद्रजस्तै बगेको गतिमा भाव र सन्देश बग्न सकोस् । कपी एन्ड पेस्टमार्फत् सम्पादकको औपचारिकता पूरा नगरोस् । ग्रेडिङमा पत्रिकाको स्थान माथि देखिए पनि सरलता र भावको गहिराइको गुण कायम गर्न पत्रिकाले अझै सकेको छैन, यो वर्षले त्यो कमीलाई पूरा गरोस् ।

‘युगदर्शन’ ले जापानमा संवाददाताको रूपमा पनि एक जना सदस्य दिएकोमा धन्यवाद भन्न चाहन्छु तर संवाददाता बनाएर मात्रै गुणस्तर कायम हुन सक्दैन । त्यसैले बेलाबेलामा उत्प्रेरणा जगाउने खालका तालिमको पनि व्यवस्था गर्न सकोस् । देश र जनताका पक्षमा निडरतापूर्वक समाचार सम्प्रेषण गर्न सकोस्, धेरै धेरै शुभकामना ।

‘युगदर्शन’ ले संसारभरि छरिएर रहेका नेपालीको आवाज पनि बोल्न सकोस् । नेपाल सरकारलाई रेमिट्यान्स चल्ने तर प्रवासी नेपालीको भोट प्रवासबाट किन नचल्ने भनेर घचघचाई देओस् । मानव तस्कर र गैरकानुनी ढङ्गले नेपालीलाई बहिर्गमन गराउने गिरोहको भण्डाफोर गर्न सकोस् । नेपालीलाई गैरनेपाली बनाउने एनआरएनएजस्तो संस्था विघटन गराएर अन्तर्राष्ट्रिय नेपाली एकता समाजको छातामुनि समेटिन सक्ने विचार सम्प्रेषण गरेर चेतना छर्न सकोस् ।