वासिङ्टन । उत्तर कोरियाली नेता किम जोङ–उन र रुसी राष्ट्रपति भ्लादिमिर पुटिनले बुधबार चीनको सबैभन्दा ठूलो सैन्य परेडमा सहभागिता जनाएपछि अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी जिनपिङलाई अमेरिकाविरुद्ध ‘षड्यन्त्र’ गरेको आरोप लगाउनुभएको छ ।

ट्रथ सोसलमा गरिएको एक पोस्टमार्फत ट्रम्पले दोस्रो विश्वयुद्धमा जापानको आत्मसमर्पणको ८०औँ वार्षिकोत्सव मनाउन आयोजित परेडमा सीको उपस्थिति र सहभागितालाई संयुक्त राज्य अमेरिकाविरुद्धको ‘षड्यन्त्र’ का रुपमा चित्रित गर्नुभयो ।

चीनले सन् १९४५ मा जापानलाई हराउँदै प्राप्त विजयलाई सम्झना गर्न सेप्टेम्बर ३ लाई विशेष वार्षिकोत्सवको रूपमा मनाउँदै आएको छ ।

‘राष्ट्रपति सी र चीनका अद्भुत जनताले भव्य र चिरस्थायी उत्सव मनाउन् । कृपया भ्लादिमिर पुटिन र किम जोङ–उनलाई मेरो न्यानो अभिवादन दिनुहोस्, किनकि तपाईंहरूले संयुक्त राज्य अमेरिकाविरुद्ध षड्यन्त्र गर्नुभयो’, परेड चलिरहेको बेला ट्रम्पले सामाजिक सञ्जालमा लेख्नुभएको थियो ।

‘उत्तर दिनुपर्ने ठूलो प्रश्न के हो भने चीनका राष्ट्रपति सीले संयुक्त राज्य अमेरिकाले चीनलाई धेरै मित्रहीन विदेशी आक्रमणकारीबाट आफ्नो स्वतन्त्रता सुरक्षित गर्न मद्दत गर्न ठूलो मात्रामा समर्थन र आफ्नै रगतसमेत दिएको थियो ? चीनको विजय र गौरवको यात्रामा धेरै अमेरिकीहरूले ज्यान दिएका थिए । म आशा गर्दछु उनीहरूको बहादुरी र बलिदानलाई उचित सम्मान र सम्झना गरिन्छ’, ट्रम्पले लेख्नुभयो ।

चीनले दोस्रो विश्वयुद्धको अन्त्यको ८०औँ वार्षिकोत्सव अवसरमा विशाल सैन्य परेड आयोजना गरेको हो । यस अवसरमा रुसी राष्ट्रपति भ्लादिमिर पुटिन र उत्तर कोरियाली नेता किम जोङ–उन बेइजिङमा चीनको सैन्य शक्ति प्रदर्शन अवलोकन गर्न उपस्थित हुनुहुन्थ्यो ।

परेडका क्रममा चीनले आफ्नो एचक्यु–९सी मिसाइल प्रणाली प्रदर्शन गर्‍यो । पाकिस्तानले आफ्ना सुरक्षा आवश्यकताका लागि यसै मिसाइल प्रणालीको संस्करण प्राप्त गरेको थियो । पाकिस्तानी मिडियाका अनुसार यस प्रणालीले ‘अपरेसन सिन्दूर’ मा प्रयोग भएको देखिए पनि भारतीय मिसाइल आक्रमण रोक्न भने असफल भएको थियो ।

यस अवसरमा चिनियाँ राष्ट्रपति सीले देशलाई ‘अजेय’ भन्दै शान्तिपूर्ण विकासप्रतिको आफ्नो दृढता दोहोर्‍याउनुभयो ।

‘चीन शान्तिपूर्ण विकासको बाटोमा अडिग रहनेछ । चिनियाँ राष्ट्रको कायाकल्प रोक्न सकिँदैन र मानवताको शान्ति तथा विकासको लक्ष्य प्रबल हुनेछ’, उहाँले भन्नुभयो ।

विश्वभर फैलिएका द्वन्द्वहरूको सन्दर्भमा उहाँले चीन ‘इतिहासको सही पक्षमा’ दृढतापूर्वक उभिने र मानवताको साझा भविष्य भएको समुदाय निर्माणमा हातेमालो गर्ने आश्वासन दिनुभयो ।

‘मानवता फेरि शान्ति वा युद्ध, संवाद वा टकराव, र जीत–जीत परिणाम वा शून्य–राशिको खेलबीच छनोटको अवस्थामा छ । चिनियाँ जनता इतिहासको सही पक्षमा, मानव प्रगतिका पक्षमा अडिग रहनेछन् । हामी शान्तिपूर्ण विकासको बाटोमा अटल रहनेछौँ र मानवताको साझा भविष्य भएको समुदाय निर्माणमा विश्वसँग हात मिलाउनेछौँ’, उहाँले भन्नुभयो ।

राष्ट्रपति सीले राष्ट्रिय कायाकल्पका लागि सेनाले रणनीतिक समर्थन पुर्‍याउनुपर्नेमा जोड दिँदै पिपुल्स लिबरेसन आर्मीलाई विश्वस्तरीय शक्ति बन्न र राष्ट्रिय सार्वभौमिकता, एकता तथा क्षेत्रीय अखण्डताको दृढ रक्षा गर्न आह्वान गर्नुभयो ।

उहाँले विश्वभरका राष्ट्रहरूलाई युद्धको कारण हटाउन र विगतका त्रासदीहरू पुनरावृत्ति हुन नदिन आह्वान गर्दै भन्नुभयो, ‘राष्ट्रहरूले एकअर्कालाई समान रूपमा व्यवहार गरे मात्र, सद्भावमा बसे मात्र र पारस्परिक समर्थन जनाए मात्र साझा सुरक्षाको रक्षा गर्न सकिन्छ ।