काठमाडौं । अखिल नेपाल महिला संघले कैलालीको क्वारेन्टिनमा भएको बलात्कारको घटनामा संलग्नमाथि कडा कारबाही गर्न माग गरेको छ ।
मंगलबार अनेमसंघका अध्यक्ष मिना पुनले एक विज्ञप्ति प्रकाशित गरी महिलाहरु कोरोनाको त्रासदीसँगै हिंसाको शिकार बनेको भन्दै गम्भीर चिन्ता जाहेर गर्नुभएको छ । घटनामा संलग्न अपराधीहरुमाथि कडा कारवाही गर्न, पीडितलाई क्षतिपुर्ती उपलब्ध गराउन र न्याय दिलाउन विज्ञप्तिमार्फत माग गरिएको छ ।
‘यतिबेला कोरोना भाइरस (कोभिढ–१९) को महामारीका कारण सम्पूर्ण नेपालीहरुले बन्दाबन्दीको जीवन गुजारीरहेका छन् । पछिल्लो समयमा दिनप्रतिदिन संक्रमण फैलिरहेको छ’ विज्ञप्तिमा भनिएको छ, ‘यसप्रकारको जटिल र त्रासदीपूर्ण अवस्थामा सिंगो मानव समूदायले त्यस विरुद्ध संघर्ष गरिरहेका बेला देशका विभिन्न भागमा कैयौं महिलाहरु भने विभिन्न खाले हिंसाको शिकार बनिरहेका छन् ।’
महिला संघले अव्यवस्थित क्वारेन्टिनका कारण महिला असुरक्षित बनेको भन्दै देशभरका क्वारेन्टिनको सुधार गर्नसमेत माग गरेको छ ।
कैलालीको लम्की चुहा नगरपालिका–१ मा रहेको श्री सहिद स्मृती माविको क्वारेन्टिनमा बसेकी ३१ वर्षीया महिलामाथी स्वास्थकर्मी र स्वयंसेवक गरि ३ जनाद्वारा सामुहिक बलात्कार भएको घटना आइतबार सार्वजनिक भएको थियो ।
प्रहरीले पीडित महिलाद्वारा किटानी जाहेरी दिइएका १७ वर्षीय सर्जन विक, २२ वर्षीय किसोर परियार र २० वर्षीय लक्षमण परियारलाई नियन्त्रणमा लिएको छ ।
