किएभ । क्यानाडाका प्रधानमन्त्री मार्क कार्नी आइतबार युक्रेनको स्वतन्त्रता दिवस मनाउन किएभ आइपुग्नुभएको छ । उहाँले विश्व नेताहरूले युक्रेन–रुस युद्ध अन्त्य गर्न दबाब दिइरहेका बेला आफ्नो उपस्थितिलाई ऐक्यबद्धताको प्रतीकका रूपमा व्यक्त गर्नुभएको हो ।
“यस युक्रेनी स्वतन्त्रता दिवसमा र आफ्नो देशको इतिहासको यो महत्वपूर्ण घडीमा, क्यानाडाले युक्रेनका लागि न्यायपूर्ण र स्थायी शान्ति दिलाउने हाम्रो समर्थन र प्रयासहरूलाई अझै बढाइरहेको छ”, कार्नीले सामाजिक सञ्जाल एक्समा लेख्नुभएको छ ।
क्यानाडाली प्रसारक सिबिसीका अनुसार कार्नीलाई स्वतन्त्रता दिवस मनाउन ‘विशेष अतिथि’ का रूपमा किएभमा आमन्त्रित गरिएको थियो ।
“युक्रेनका लागि क्यानाडाको समर्थन दृढ छ । हामी तपाईंको सार्वभौमिकताको रक्षा गर्न र तपाईंको सपनाहरू साकार पार्न तपाईंको सङ्घर्षको प्रत्येक चरणमा तपाईंको साथमा छौँ”, कार्नीले किएभ आइपुगेपछि आफ्नै एक्स खातामा सार्वजनिक गरिएको भिडियो सन्देशमा भन्नुभयो ।
तीन वर्ष लामो द्वन्द्वबीच मस्कोले शनिबार पूर्वी युक्रेनको डोनेट्स्क क्षेत्रका दुई गाउँ कब्जा गरेको घोषणा गरेको बेला उहाँको यो भ्रमण भएको हो । यसले रुसी सेनाले ढिलो गतिमा भए पनि केही लाभ हासिल गरिरहेको संकेत गर्दछ ।
यद्यपि, कार्नीको भ्रमण त्यस्तो समयमा भएको छ जतिबेला रुसी र युक्रेनी राष्ट्रपतिहरूबीच शिखर बैठक हुने सम्भावना क्रमशः घट्दै गएको छ । यो सम्भावित समाधानलाई अमेरिकी राष्ट्रपति डोनाल्ड ट्रम्पले पनि युद्ध अन्त्य गर्ने आफ्नो प्रयासको एक अंशका रूपमा समर्थन गर्नुभएको थियो ।
हालै दक्षिण अफ्रिकाका राष्ट्रपति सिरिल रामाफोसाले समेत रुसी राष्ट्रपति भ्लादिमिर पुटिन र युक्रेनी समकक्षी भोलोदिमर जेलेन्स्कीलाई भेटवार्ताका लागि आह्वान गर्नुभएको थियो ।
