काठमाडौं । सरकारले कोरोना नियन्त्रण तथा उपचारमा लागेको हिसाब चाँडै र्साजनिक गर्ने जनाएको छ । कोभिड–१९ संकट व्यवस्थापन समिति (सीसीएमसी) निर्देशक समितिको शुक्रबार साँझ बसेको बैठकले कोरोना भाइरस रोकथाम तथा नियन्त्रणका लागि भएको खर्चको फाँटवारी छिट्टै सार्वजनिक गर्ने निर्णय गरेको हो ।
समितिको बैठकपछि समितिका संयोजक तथा उपप्रधानमन्त्री एवं रक्षामन्त्री ईश्वर पोखरेलले जारी गरेको वक्तव्य पढेर सुनाउँदै परराष्ट्रमन्त्री प्रदीप ज्ञवालीले केही दिन भित्रमै खर्चको हिसाब सार्वजनिक हुने बताउनुभयो । उहाँले भन्नुभयो, ‘कोरोनाको रोकथाम तथा नियन्त्रण र उपचारका लागि नेपाल सरकारको तर्फबाट विभिन्न शिर्षकमा निकासा भएको छ। प्रदेश सरकार र स्थानीय तहहरुले पनि आफ्ना कोषहरुबाट यस विषयमा खर्च गरेका छन्। सरकारबाट समग्र फाँटवारी छिट्टै सार्वजनिक हुने छ ।’
मन्त्री ज्ञवालीले सरकारले पीसीआर परीक्षणलाई पनि बढाउने निर्णय गरेको जानकारी दिनुभयो । यस्तै, सरकारले क्वारन्टिनको गुणस्तर सुधार गर्ने प्रतिवद्धता समेत जनाएको छ ।
हाल देशका विभिन्न भागमा कोरोना नियन्त्रणमा लागेको हिसाब सार्वजनिक हुनपर्ने, पीसीआर परीक्षण बढाउनुपर्ने, क्वारेन्टिन सुधार गर्नुपर्ने लगायतका माग राख्दै आन्दोलन भइरहेको छ । सरकारले ति ओन्दोलनप्रति ध्यानाकर्षण भएको जनाउँदै सामाजिक दुरीको ख्याल गर्न भनेको छ ।
