काठमाडौं । सरकारले लिम्पियाधुरा लगायतका क्षेत्र समेटी तयार पारेको नक्सा नेपालको निशानछापमा प्रतिविम्वित गर्न पेश गरेको संविधान संशोधनबारे शनिबार निर्णय हुने भएको छ ।
सरकारले प्रस्तुत गरेको संविधान संशोधन प्रस्तावमा सबै राजनीतिक दलहरुको ऐक्यवद्धता रहेकोले सो प्रस्ताव दुई तिहाई भन्दा बढी मतले पा हुने निश्चित छ ।
संसदमा प्रतिनिधित्व गर्ने सबै दलले विधेयकप्रति समर्थन जनाएका छन् । यद्यपी समाजवादी पार्टीकी सांसद सरिता गिरीले सो विधेयक खारेजीको माग गर्दै संसदमा प्रस्ताव दर्ता गराएकी थिइन् । तर उनको दल जनता समाजवादी पार्टीले सो प्रस्ताव फिर्ता लिन निर्देशन दिँदै फिर्ता नलिए कारबाही गर्ने चेतावनी दिएको छ ।
संसदमा प्रस्तुत संविधान संशोधन प्रस्तावलाई एक मतका साथ पास गर्न सरकारले आग्रह गरेको छ । राष्ट्रिय जनमोर्चाले सो प्रस्तावप्रति दृढ समर्थन जनाउँदै प्रस्तावका पक्षमा एकजुट हुन आह्वानसमेत गरेको छ ।
संसदमा प्रतिनिधित्व गर्ने नेकपा, नेपाली कांग्रेस, जनता समाजवादी दल, नेमकिपा, राप्रपालगायत स्वतन्त्र सांसदहरुले प्रस्तावको समर्थन गरेका छन् ।
