बागलुङबजार । बागलुङमा अखिल नेपाल जनजाति सम्मेलनले एकतिसौँ विश्व आदिवासी दिवस मनाएको छ ।
२०८२ साउन २४ गते शनिबार दुदिलाभाटीमा एक औपचारिक समारोहबिच सो कार्यक्रम सम्पन्न भएको हो ।
कार्यक्रमका प्रमुख अतिथि जनजाति सम्मेलन गण्डकी प्रदेश समितिका सदस्य तुलवीर श्रीस हुनुहुन्थ्यो ।
सो अवसरमा मन्तव्य राख्दै श्रीसले आदिवासी जनजातिका समस्या जातीय समस्याजस्तो देखिए पनि मूल रूपमा वर्गीय समस्या नै भएको बताउनुभयो ।
राष्ट्रिय जनमोर्चाका केन्द्रीय सल्लाहकार तथा जिल्ला समन्वय समिति बागलुङका प्रमुख अमर थापा विशिष्ट अतिथि रहनुभएको सो कार्यक्रमको अन्य अतिथिमा केन्द्रीय सदस्य बेदिलाल सापकोटा, राजमो जिल्ला अध्यक्ष तिलक थापा, नेकपा (मसाल) बागलुङका प्रवक्ता मेकबहादुर पाइजा, राजमो गलकोटका अध्यक्ष टङ्कबहादुर केसी, राजमो जिल्ला सदस्य लालबहादुर राना, अखिल नेपाल शिक्षक सङ्घ बागलुङका अध्यक्ष मित्रदत्त ढकाल, जातीय समता समाज बागलुङका सदस्य रनबहादुर विकलगायतले मन्तव्य राख्नुभएको थियो ।
कार्यक्रममा राजमो गण्डकी प्रदेश उपाध्यक्ष धर्म कुँवर, जिल्ला सचिव भीमलाल पोखरेल, सल्लाहकार भीमसेन वन, अखिल नेपाल महिला सङ्घ बागलुङकी सदस्य दुर्गा पुन, जनजाति सम्मेलन बागलुङका जिल्ला सदस्यलगायतका अतिथिको आतिथ्य रहेको थियो ।
जनजाति सम्मेलन बागलुङका उपाध्यक्ष ओमबहादुर पुनको अध्यक्षतामा अघि बढेको सो कार्यक्रमको सञ्चालन जिल्ला सदस्य होमबहादुर पुनले र स्वागत मीनबहादुर मगरले गर्नुभएको थियो ।
वडाभेला पनि
सोही दिवसको कार्यक्रमसँगै जनजाति सम्मेलनको वडाभेला सम्पन्न भएको छ ।
भेलाले छमबहादुर पुन अध्यक्ष रहनुभएको सात सदस्यीय जनजाति सम्मेलन दुदिलाभाटी वडा समिति चयन गरेको छ ।
समितिको सचिवमा दुर्गा पुन, कोषाध्यक्षमा डिलमाया पुन तथा सदस्यमा मनमाया पुन, नारायण राना, कर्णबहादुर श्रीस र टेकबहादुर बुढाथोकी रहनुभएको छ ।
