दाङ । अखिल नेपाल जनजाति सम्मेलन दाङको आयोजनामा एकतिसौँ विश्व आदिवासी दिवस मनाइएको छ ।
२०८२ साउन २४ गते (अगस्त ९) शनिबारका दिन घोराहीमा सो कार्यक्रम सम्पन्न भएको हो ।
कार्यक्रममा प्रमुख अतिथि जनजाति सम्मेलनका केन्द्रीय उपाध्यक्ष रमेशमान गुरुङ हुनुहुन्थ्यो ।
सो अवसरमा मन्तव्य राख्दै उहाँले विश्वभरि छरिएर रहेका आदिवासीले अगस्त ९, १९८२ देखि आदिवासी आन्दोलन अगाडि बढेको बताउनुभयो ।
अगस्त ९ का दिन सम्पन्न युएन वर्किङको पहिलो बैठकको आधारमा संयुक्त राष्ट्र सङ्घले मान्यता दिएसँगै सन् १९९३ देखि विश्व आदिवासी दिवस मनाउन सुरु गरिएको उहाँले जानकारी दिनुभयो ।
नेता गुरुङले नेपालमा जनजाति नै अधिकांश आदिवासी भएकाले जनजाति र आदिवासीको अधिकार सुनिश्चितता र मुक्तिका लागि यसलाई वर्गीय मुक्ति आन्दोलनसँग जोडेर अगाडि बढाउनुपर्ने आवश्यकतामा जोड दिनुभयो ।
कार्यक्रममा अखिल नेपाल युवक सङ्घका पूर्व केन्द्रीय अध्यक्ष काशीनाथ पोख्रेल, जनजाति सम्मेलनकै पूर्व केन्द्रीय सदस्य रामबहादुर जिएम, अखिल नेपाल प्रगतिशील लेखक सङ्घ (अन्पा) लुम्बिनी प्रदेश समितिका उपाध्यक्ष सुरेशकुमार पाण्डे, राष्ट्रिय जनमोर्चा दाङका जिल्ला सदस्य मेघराज भट्टराई, अखिल नेपाल महिला सङ्घकी राष्ट्रिय परिषद् सदस्य कृष्णा राना, अखिल नेपाल शिक्षक सङ्घ दाङका सहसचिव ओमकला खनाल, राजमो रोल्पाका जिल्ला सदस्य केबी थापा, वरिष्ठ राजमो सदस्य बुद्धिराम खड्का, रक्तिम सांस्कृतिक अभियान घोराही नगर समितिका उपाध्यक्ष रोशनी जिएम र अखिल नेपाल राष्ट्रिय स्वतन्त्र विद्यार्थी युनियन (छैठौं) का नगर सदस्य सुभाष पुनलगायतको आतिथ्य रहेको थियो ।
जनजाति सम्मेलनका जिल्ला सदस्य मङ्गल घर्तीको स्वागत मन्तव्यबाट सुरु भएको उक्त कार्यक्रमको अध्यक्षता जिल्ला उपाध्यक्ष जितबहादुर पुनले र सञ्चालन जिल्ला सचिव दलबहादुर घर्तीले गर्नुभएको थियो ।
