काठमाडौं । जनता समाजवादी पार्टीकी सांसद सरिता गिरीले सरकारले संसदमा प्रस्तुत गरेको लिम्पियाधुरासहितको नक्सा समेटिएको नयाँ नक्सा सम्बन्धी संविधान संशोधन प्रस्ताव खारेज गर्न माग गरेकी छन् ।
‘लिम्पियाधुरा नेपालको हो भन्ने कुरा आफूले स्वीकार नगर्ने’ बताउँदै आएकी गिरीले निशान छाप सम्बन्धी संविधान संशोधन बिधेयकनै खारेज हुनुपर्ने भनी संशोधन दर्ता गराएकी छन् ।
गिरीले बुधबार संसद सचिवालयमा सो सम्बन्धी प्रस्ताव दर्ता गराएको सचिवालयको विधेयक शाखाले जनाएको छ । उनले दिएको संशोधनको सूचनामा स्रोत र प्रमाण नखुलेको भन्दै विधेयकको दफ २ हटाउन भनिएको छ । दफा दुईमा नेपालको नयाँ नक्सा बमोजिमको अनुसूची संशोधन गर्नेगरी सरकारले विधेयक प्रस्तुत गरेको छ ।
नयाँ नक्सा बमोजिम निशान छाप परिवर्तनका लागि संविधान संशोधन प्रस्ताव उपर संसदमा मंगलबार भएको छलफलले ‘विचार गरियोस्’ भन्ने प्रस्ताव सर्वसम्मतीले पारित भएको थियो । गिरीकै पार्टी जनता समाजवादीका नेताहरुले समेत सो प्रस्तावउपर समर्थन जनाएका थिए ।
मंगलबारको छलफलमा सामेल नभएकी सरिता गिरीले बुधबार प्रस्ताव नै खारेज गर्न माग गर्दै संशोधन प्रस्ताव दर्ता गराएकी हुन् ।
नेपालको सार्वभौमिकता र भौगोलिक अखण्डता विरुद्ध बोलेको भन्दै गिरीको सांसद पद खारेज गर्नुपर्ने माग उठिरहेको बेला उनले नयाँ नक्सा सम्बन्धी संविधान संशोधन प्रस्ताव नै खारेज गर्न माग गरेकी छन् ।
