बागलुङ । अमेरिकी सहयोग मिलेनियम च्यालेन्ज कर्पोरेशन (एमसीसी) खारेजीको माग गर्दै बागलुङमा विरोध सभा गरिएको छ । मंगलबार राष्ट्रिय जनमोर्चा काठेखोला गाउँपालिकाको आयोजनामा तंग्राममा विरोध सभा सम्पन्न गरिएको हो ।
राष्ट्रिय जनमोर्चाका परिषद् सदस्य तथा अखिल नेपाल युवक संघका पुर्व केन्द्रीय अध्यक्ष तिलक थापाले अनुदानको नाममा देशलाई बन्धक बनाउन नहुने भन्दै देश महामारीमा रहेको बेला सरकारको नीति तथा कार्यक्रममा एमसीसी आउनु दुखद बिषय रहेको बताउनु भयो ।उहाँले एमसीसी सदनबाट पारित गरेर राष्ट्र माथि कुठाराघात नगर्न र राष्ट्रिय स्वाधीनता जोगाउन सम्पूर्ण जनताहरु एक हुन आग्रह समेत गर्नुभयो ।
कार्यक्रममा राजमो काठेखोलाका सचिव तथा काठेखोला गाउँ कार्यपालिका सदस्य टीका संगम बिक लगायतले मन्तव्य राख्नुभएको थियो ।
राजमो काठेखोला गाउँपालिका अध्यक्ष लक्ष्मण पुनको अध्यक्षता र कृष्ण बिकको सञ्चालनमा विरोध सभा सम्पन्न भएको थियो ।
