काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभाका सांसद राजेश विश्वकर्माले कुलिङ पिरियड प्रकरणमा दोषी पत्ता लगाई कारबाही गर्न माग गर्नुभएको छ ।
२०८२ असार ३१ गते अठारौँ अधिवेशनको बैठक सङ्ख्या ३१ मा प्रस्तुत ‘सङ्घीय निजामति सेवा विधेयक–२०८०’ माथिको छलफलमा भाग लिँदै उहाँले सो माग गर्नुभएको हो ।
‘कुलिङ पिरियड प्रकरणमा बाहेक शब्द थपिनु आपत्तिजनक छ’ उहाँले भन्नुभयो– ‘कोबाट, कसरी यस खालको फेरबदल भयो ? यसको खोजबिन गरियोस् । छानबिन समितिले सही सत्य तथ्य ल्याओस् र दोषीमाथि कारबाही गरियोस् ।’
उहाँले विधेयकमा तल्लो तहका कर्मचारीको समस्या सम्बोधन नभएको पनि बताउनुभयो ।
‘तल्लो तहका कर्मचारीका तलब, सेवासुविधा, पदोन्नतिको विषयमा थुप्रै प्रश्न उठेका छन् । यसलाई परिमार्जन गरी सर्वसम्मतिसाथ पारित गरियोस्’ सांसद विश्वकर्माको भनाइ थियो ।
सङ्क्षिप्त मन्तव्यको क्रममा उहाँले विधेयकमा उपल्लो तहका कर्मचारीले आफूखुसी गरेको पनि बताउनुभयो ।
‘उच्च तहका कर्मचारीले आफूलाई सोऱ्याक पर्ने गरी अपराध गरिएको छ’ उहाँले भन्नुभयो– ‘यो जघन्नय अपराध हो एक प्रकारको, गम्भीर अपराध ।’
