काठमाडौँ । कैलालीका राजनीतिक दल, सङ्घसंस्था, नागरिक समाज र समाजसेवीहरूले रुकुम पश्चिमको जातीय विभेदसम्बन्धी चौरजहारी घटनाबारे प्रधानमन्त्रीको नाममा नौ बुँदे ध्यानाकर्षण पत्र बुझाएको छन् । कैलालीको इलाका प्रशासन कार्यालय मार्फत् उनीहरूले २०७७ जेष्ठ २५ गते ध्यानाकर्षण पत्र बुझाएका हुन् ।

ध्यानाकर्षण पत्रमा चौरजहारी घटनाको सत्यतथ्य छानबिन गरी दोषीमाथि हदैसम्मको कारवाही गर्नुपर्ने, उक्त हत्याकाण्डमा ज्यान गुमाएका छ जनालाई सांस्कृतिक रूपान्तरण अभियानको सहिद घोषणा गरी आश्रित परिवारलाई उचित क्षतिपूर्ति दिनुपर्ने, छानबिनका लागि उच्चस्तरीय संसदीय छानबिन समिति गठन गर्नुपर्ने, घाइतेको उपचार तथा घटनामा बाँच्न सफल १२ जनाका लागि सुरक्षाको प्रत्याभूति गर्नुपर्ने, जातीय विभेदसम्बन्धी अजित मिजारजस्ता घटनाको पुनः छानबिन हुनुपर्ने र देशभरि घट्ने जातीय विभेदसम्बन्धी घटनलाई जघन्य अपराधको सूचीमा राख्ने संवैधानिक व्यवस्था हुनुपर्ने माग गरेका छन् ।

सो अवसरमा उनीहरूले सुदूरपश्चिम प्रदेशका क्वारेन्टाइनमै भइरहेका जातीय भेदभावसम्बन्धी घटनालाई कानुनी दायरामा ल्याउन र दलितलाई खसआर्यको सूचीमा राख्ने गरी संविधान संशोधन गर्नसमेत माग गरिएको छ ।

ध्यानाकर्षण पत्रमा जातीय समता समाजका केन्द्रीय सदस्य तिलक परियार, नेपाल दलित मुक्ति सङ्गठनका केन्द्रीय सदस्य दानबहादुर विश्वकर्मा र नेपाल दलित सङ्घका क्षेत्रीय सदस्य जवालसिंह तिरुवाले हस्ताक्षर गरेका छन् ।

त्यसैगरी ध्यानाकर्षण पत्रमा राष्ट्रिय जनमोर्चा कैलालीका अध्यक्ष दयाराम सञ्ज्याल, नेपाल कम्युनिस्ट पार्टी (नेकपा) का प्रतिनिधि रङ्गप्रसाद अधिकारी, नेपाली काङ्ग्रेसका नगर सभापति धनराज उपाध्याय, नेकपा (माले) का तिलक श्रेष्ठ, राष्ट्रिय प्रजातन्त्र पार्टीका मानसिंह साउद, नेपाल दलित जनउत्थान समाजका अध्यक्ष सचिनसिंह विश्वकर्मा, स्पिड नेपालका अध्यक्ष ललिता सुनार, नेपाल दलित अधिकार अभियानका अध्यक्ष धनबहादुर विश्वकर्मा, कैलाली सुनचाँदी आभूषण व्यवसायी सङघका अध्यक्ष देवबहादुर सुनार, थारू कल्याणकारिणी सभाका अध्यक्ष लौटन चौधरी, नेपाल समावेशी दलित उत्थान मञ्चका अध्यक्ष जयसुर सार्की, सामुदायिक सशक्तीकरण विकास संस्थाका अध्यक्ष रमेश सोव, संयुक्त दलित उत्थान मञ्चका अध्यक्ष ईश्वर ओड, नेपाल दलित समाज केन्द्रका अध्यक्ष रामबहादुर विक, दिगो विकास मञ्जका अध्यक्ष भक्तबहादुर विश्वकर्मा र अखिल भारत नेपाली एकता मञ्चका केन्द्रीय सचिव सुरेन्द्र देउकरको हस्ताक्षर छ ।

एवम् प्रकारले ध्यानाकर्षण पत्रमा समाजसेवी नन्दराम विश्वकर्मा, मोहन विश्वकर्मा र टीकारम सोवले पनि हस्ताक्षर गरेका छन् ।