काठमाडौं । मिलिनियम च्यालेन्ज कर्पोरेशन (एमसीसी) सम्झौताका विरुद्ध राष्ट्रिय जनमोर्चाले सोमबार (जेठ २६ गते) देशब्यापी विरोध सभाको आयोजना गर्ने भएको छ ।

संसदमा विचाराधिन एमसीसी पारित गराएर सरकारले नेपाललाई अमेरिकी साम्राज्यवादको गतिविधि गर्ने स्थल बनाउन खोजेको भन्दै राजमोले त्यसको खारेजीको माग गरेको छ ।

आइतबार एक वक्तव्य प्रकाशित गरी अध्यक्ष चित्रबहादुर केसीले सम्भव भएसम्म विभिन्न राजनीतिक पार्टी तथा संगठनसँग सहकार्य गरेर एमसीसीविरुद्ध विरोध प्रदर्शन गर्न पनि पार्टी पंक्तिलाई आह्वान गर्नुभएको छ ।

एमसीसीविरुद्ध नेकपा (मसाल) लगायतका १० राजनीतिक दल तथा संगठनहरुले लगातार संयुक्त कार्यक्रम गर्दै आएका छन् भने राजमोले एकल आन्दोलन पनि गर्दै आएको छ ।

यस्तो छ, वक्तव्यः
मिलिनियम च्यालेन्ज कर्पोरेशन (एमसीसी) सम्झौताका विरुद्ध विगतदेखि नेपालमा व्यापक विरोध सहित संघर्षहरु हुँदै आएका छन् । एमसीसी हिन्द प्रशान्त रणनीतिको अंग हो भन्ने कुरा स्वयम् अमेरिकी सरकारी अधिकारीहरुले बोलिसकेका छन् । त्यो हिन्द प्रशान्त रणनीतिको अंग हो भन्ने कुरा सम्झौतामा उल्लेख भएका विषयहरुबाट पनि प्रष्ट हुन्छ । तर नेपाल सरकारले त्यसरी प्रष्ट भएको विषयलाई हिन्द प्रशान्त रणनीतिको अंग नभएको भन्ने भ्रम पैदा गरी संसदबाट पारित गराउने प्रयत्न गरिरहेको छ । सरकारको त्यसप्रकारको अमेरिकी साम्राज्यवादको सेवा गर्ने नीतिको हामीले विरोध गर्दछौँ ।

देशमा एमसीसी पारित भएमा नेपालले अहिलेसम्म अपनाउँदै आएको असंलग्न परराष्ट्र नीति समाप्त भई अमेरिकी साम्राज्यवादको खेमामा प्रवेश गर्नेछ । त्यसरी नेपाल अमेरिकी साम्राज्यवादको गतिविधि गर्ने स्थल बन्ने छ । त्यसबाट नेपालको सार्वभौमिकता, स्वतन्त्रता र स्वाधीनतामा चुनौति सृजना हुनेछ । त्यसैले एमसीसी पारित गर्न खोज्नु गम्भीर राष्ट्रघात हुनेछ । सरकारले अहिले त्यसप्रकारको राष्ट्रघाती कार्यका लागि प्रयत्न गरिरहेकोले त्यसलाई असफल पार्नका लागि सम्पूर्ण देशभक्त जनताको संयुक्त संघर्ष र आन्दोलन एकमात्र विकल्पको रुपमा अगाडि आएको छ ।

जनताको देशभक्तिपूर्ण संघर्ष र आन्दोलनले सरकारको त्यसप्रकारको प्रयत्नलाई असफल बनाउने छ भन्ने हामीलाई विश्वास छ । यस सन्दर्भमा २०७७ जेठ २६ गते देशव्यापी रुपमा विरोध कार्यक्रमको आयोजना गरिएको छ । उक्त कार्यक्रमलाई सम्भव भएसम्म एमसीसी विरोधी बिभिन्न पक्षहरुसित सहकार्य गरी सम्पन्न गरिने छ र त्यसरी सम्भव नभएमा राष्ट्रिय जनमोर्चाको एक्लैको आयोजनामा पनि सम्पन्न गरिने छ । राष्ट्रघाती कदमका विरुद्ध ऐक्यवद्धताका साथ संघर्षमा उत्रिन हामीले सम्पूर्ण जनतालाई हार्दिक आव्हान गर्दछौँ ।