काठमाडौँ । इरानमाथि अमेरिका र इजरायलले गरेको आक्रमणलाई नेपालमा विभिन्न राजनीतिक पार्टी तथा वाम बुद्धिजीवीले युद्ध अपराधको सङ्ज्ञा दिएका छन् ।
२०८२ असार ८ गते शनिबार संयुक्त प्रेसवक्तव्य जारी गर्दै उनीहरूले सो धारणा व्यक्त गरेका हुन् ।
राष्ट्रिय जनमोर्चाको केन्द्रीय कार्यालय भवनको सभाकक्षमा सम्पन्न बैठकपछि जारी गरिएको संयुक्त वक्तव्यमा अमेरिका र इजरायलले इरानको राष्ट्रिय स्वाधीनतामाथि मात्रै नभएर अन्तर्राष्ट्रिय कानुनको उल्लङ्घनसमेत गरिएको उल्लेख छ ।
इरानमाथि अमेरिकी साम्राज्यवादको आक्रमणलाई विश्वयुद्धको दुष्प्रयास बताउँदै वक्तव्यमा त्यसको विकल्पमा विश्वशान्ति कायम गर्न आग्रह गरिएको छ । त्यसका लागि संयुक्त राष्ट्र सङ्घको बडापत्र, पञ्चशीलको सिद्धान्त र अन्तर्राष्ट्रिय कानुनको आधारमा समस्याको शान्तिपूर्ण समाधान खोज्न माग गरिएको छ ।
अमेरिकी र इजरायली साम्राज्यवादको विरोध गर्न, स्वाधीन राष्ट्रको पक्षमा उभिन तथा इरानमा रहेका नेपालीको सुरक्षाका लागि पहल गर्न वक्तव्यमा आह्वान गरिएको छ ।
वक्तव्यमा नेकपा (मसाल) का महामन्त्री मोहनविक्रम सिंह, राष्ट्रिय जनमोर्चाका अध्यक्ष चित्रबहादुर केसी, नेकपा (माओवादी केन्द्र) का महासचिव देव गुरुङ, नेपाल कम्युनिस्ट पार्टीका महासचिव विप्लव सी, नेकपा (एकीकृत समाजवादी) का स्थायी समिति सदस्य बलराम बासकोटा, क्रान्तिकारी कम्युनिस्ट पार्टी नेपालका पिबिएम पवनमान श्रेष्ठ, वैज्ञानिक समाजवादी कम्युनिस्ट पार्टी नेपालमा महासचिव आहुति, नेकपा (बहुमत) का कृष्णप्रसाद धमला, नेकपाका उपाध्यक्ष रामबहादुर भण्डारी, वाम बुद्धिजीवी निनु चापागाईं र राजनीतिक संवाद थालीका संयोजक सङ्गीत श्रोताको हस्ताक्षर रहेको छ ।
