काठमाडौँ । प्रगतिशील लेखक सङ्घ नेपालले नियमित रूपमा सञ्चालन गर्दै आएको ‘विचार चौतारी’ कार्यक्रमको असिऔँ शृङ्खलामा प्रगतिवादी लेखक तथा साहित्यकार मोहनविक्रम सिंहको उपस्थिति हुने भएको छ ।
सङ्घको वैचारिक विमर्श तथा परिसंवाद विभागको आयोजनामा असार १३ गते दिउँसो २ बजेबाट सो कार्यक्रम सुरु हुने कार्यक्रममा उहाँको उपस्थिति हुने भएको हो ।
यसअघि ‘प्रलेस परिसंवाद’ नाम रहेको सो कार्यक्रमको अहिलेको अङ्कमा ‘गणतान्त्रिक आन्दोलनमा प्रगतिशील स्रष्टाहरूको भूमिका’ विषयमा केन्द्रित हुनेछ ।
सो चौतारीको टिप्पणीकारमा प्राडा जीवेन्द्रदेव गिरी र डा वृन्दा पाण्डे रहनुहुनेछ । कार्यक्रममा अग्रज प्रगतिशील स्रष्टाको व्यापक रूपमा उपस्थिति हुने पनि प्रलेसले जानकारी दिएको छ ।
केन्द्रीय उपाध्यक्ष तथा विभागका अध्यक्ष समीर सिंहको अध्यक्षतामा असार १ गते बसेको बैठकले समितिलाई पूर्णतासमेत दिएको छ ।
विभागको समितिमा डा अमृता शर्मा, कुशल बोगटी, डा कृष्ण सुवेदी भारद्वाज, डा बालचन्द्र मिश्र, डा दीपक गौतम, रमेश पन्त मितबन्धु, दुर्गा परियार, रामरिझन यादव, मोक्तान थेवा, भीम रानाभाट र डा मुकुन्द पराजुली हुनुहुन्छ ।
समितिले देशव्यापी रूपमा नै वैचारिक कार्यक्रम चलाउन प्रदेश तथा जिल्लास्तरमा समेत क्रियाशील हुने बताएको छ ।
