काठमाडौं । बिहीबार बिहान मृत्यु भएका सुर्खेतको पञ्चपुरी नगरपालिका–१ हाँसेगाउँका २० वर्षीय युवकमा कोरोना संक्रमण पुष्टि भएको छ । उनलाई आरडीटी परीक्षण गर्दा नेगेटिभ आएपछि क्वारेन्टिनबाट घर पठाइएको थियो । घर पुगेको दुई घण्टामै उनको ज्यान गएपछि पीसीआर परीक्षण गर्दा कोरोना पुष्टि भएको हो ।
शुक्रबार बिहानै विज्ञप्ति जारी गरेर कर्णाली प्रदेश, स्वास्थ्य सेवा महाशाखाका प्रमुख डा. लक्ष्मीनारायण तिवारीले उनको मृत्यु कोरोनाकै कारण भएको पुष्टि गर्नुभएको छ ।
यही जेठ ७ गते भारतबाट स्वदेश आएका उनी स्थानीय विद्यापुरस्थित जनता माविको क्वारेन्टिनमा बसेका थिए । आरडीटी परीक्षण गर्दा नतिजा नेगेटिभ आएपछि उनलाई २१ गते राति घर पठाइएको थियो । तर भोलिपल्ट बिहीबार बिहानै सवा २ बजे उनको मृत्यु भएको थियो ।
त्यसपछि उनको स्वाब सदरमुकाम वीरेन्द्रनगरस्थित प्रयोगशालामा पठाइएको थियो । जसको रिपोर्ट पोजेटिभ आएको कर्णाली प्रदेश सरकार, स्वास्थ्य महाशाखाले जानकारी दिएको हो ।
मुम्बइबाट आएका युवकको क्वारेन्टिनबाट घर पुग्नासाथ मृत्यु
योसँगै नेपालमा कोरोनाका कारण मृत्यु हुनेको सख्या ११ पुगेको छ ।
जुम्लामा क्वारेन्टिनमा बसेका व्यक्तिको मृ्त्यु
यता, जुम्लामा पनि क्वारेन्टिनमा बसेका एक व्यक्तिको मृत्यु भएको छ । जुम्ला जिल्ला प्रहरी कार्यालयका अनुसार जिल्लाको चन्दननाथ नगरपालिका–८ तलिउमस्थित माध्यामिक विद्यालयको क्वारेन्टिनमा बसेका ६५ वर्षीय पुरुषको बिहीबार राति मृत्यु भएको हो ।
उनी यही जेठ २१ गते बर्दियाबाट आएका थिए । कोरोना भए नभएको एकिन गर्न मृतकको स्वाव परीक्षणका लागि पठाइएको प्रहरीले जनाएको छ ।
