काठमाडौँ । बम विष्फोटका घाइतेलाई इँटाभट्टामा लगेर जिउँदै जलाएको आरोप लागेका नेपाली कांग्रेसका नेता एवं पूर्वमन्त्री मोहम्मद अफताब आलम रिहा भएका छन् ।
बुधबार उच्च अदालत जनकपुरको वीरगञ्ज इजलासबाट सफाइ पाएपछि आलम रिहा भएका हुन्।
ललितपुरको नख्खु कारागारमा रहेका उनी बुधबार साँझ रिहा भएसँगै ठूलो संख्यामा रहेका कांग्रेसका नेता कार्यकर्ताले उनको स्वागत गरेका छन् ।
उच्च अदालतका न्यायाधीशद्वय खुसीप्रसाद थारू र अर्जुन महर्जनको इजलासले रौतहट जिल्ला अदालतको फैसला उल्टाउँदै आलमलाई सफाइ दिएको हो।
२०६४ चैत २७ गते राति राजपुर नगरपालिकाको फरदवा गाउँमा भएको बम विस्फोट र त्यसपछि प्रमाण नष्ट गर्न २३ जनालाई इँटाभट्टामा जिउँदै जलाएर मारेको अभियोगमा मोहम्मद आफताब आलम, उनका भाइ मोहम्मद महताब आलम र शेख सराजसहित ११ जनाविरुद्ध ०७६ साल कात्तिक १८ गते मुद्दा दर्ता भएको थियो । सो मुद्दामा आलम ०७६ असोजमा पक्राउ परेका थिए ।
यसबीचमा कांग्रेस सभापती शेरबहादुर देउवाले पटक पटक आलमलाई छुटाउने बताउँदै आएका थिए।
आज ‘संकलित सबुद प्रमाणबाट मोहम्मद आफताब आलमको घरमा २०६४/१२/२७ मा बम विस्फोटको वारदात वस्तुनिष्ठ प्रमाणले पुष्टि हुन नसकेको’ भन्दै उच्च अदालतले आलमलाई सफाइ दिएको हो ।
