हेटौँडा । मकवानपुरमा ब्रेक फेल भएको बसले ठक्कर दिँदा दुई जनाको ज्यान गएको छ ।
सोमबार साँझ मकवानपुरको थाहा नगरपालिका–०३ स्थित विद्युत प्राधिकरण नजिकै त्रिभुवन राजपथमा भएको दुर्घटनामा ४ जना घाइते भएका छन्।
साँझ करिब ६ः५९ बजे गोपाली गाउँबाट थानाबजारतर्फ जाँदै गरेको बा ३ ख ५९९० नम्बरको यात्रुबाहक बस ब्रेक फेल भई सडकमा हिँडिरहेका पैदलयात्रुलाई ठक्कर दिँदै थाहा नगरपालिकाका उप–मेयर भरत गोपालीको घरभित्र पसेको प्रहरीले जनाएको छ।
दुर्घटनापछि ईलाका प्रहरी कार्यालय पालुङबाट खटिएको प्रहरी टोलीले घाइतेहरूको उद्धार गरी उपचारका लागि अस्पताल पठाएको थियो। दुर्घटनामा परेका मध्ये दुई जनाको उपचारका क्रममा मृत्यु भएको छ।
मृत्यु हुनेमा हाल ठेगाना नखुलेका करिब ३५र४० वर्षका कृष्ण बलामी र लोकेन्द्र कुमार ठाकुर रहेका छन्। दुवैको प्राथमिक स्वास्थ्य केन्द्र पालुङमा उपचारका क्रममा साँझ मृत्यु भएको प्रहरीले जनाएको छ ।
त्यस्तै, गम्भीर घाइते भएका रघुनन्दन यादव र कमलेश कुमार साहलाई थप उपचारका लागि काठमाडौं ट्रमा सेन्टर पठाइएको छ।
घाइते अन्य दुई जनामा बारा जितपुर सिमरा उपमहानगरपालिका–१७ निवासी छेयाङ दोर्जे लामा र बारा कोल्बी नगरपालिका–०१ निवासी रामगुलाम चौधरी रहेका छन्। उनीहरूको अवस्था सामान्य रहेको र पालुङमै उपचार भइरहेको प्रहरीले जनाएको छ।
दुर्घटनापछि थाहा नगरपालिका–५ निवासी २९ बर्षका बस चालक राजेश कार्की लाई प्रहरीले नियन्त्रणमा लिएर थप अनुसन्धान गरिरहेको छ ।
