भरतपुर । जिल्लाका केही दुग्ध उत्पादक डेयरीले दुध नउठाउने चेतावनी दिएका छन् ।
भुक्तानीका लागि दबाब दिन यहाँका दुग्ध उत्पादक सहकारी संस्थाले सो चेतावनी दिएका हुन् ।
चितवन जिल्ला दुग्ध उत्पादक सहकारी सङ्घका अध्यक्ष किशोर बगालेले भन्नुभयो– ‘अहिले भुक्तानी माग गरेका सहकारीबाट दुध उठ्न कठिन भएको छ ।’
यहाँ उत्पादित दुध सरकारको स्वामित्वमा रहेको दुग्ध विकास संस्थान (डिडिसी) र निजी कम्पनीले लैजाने गरेका छन् ।
उहाँका अनुसार जिल्लामा रहेका दुग्ध उत्पादक सहकारीले विभिन्न डेयरीबाट रु ८० करोड बढीको भुक्तानी पाउन बाँकी रहेको छ । सो रकममध्ये डिडिसीको रु ३५ करोड बढी रहेको छ भने अन्य रकम निजी डेयरीको हो ।
अध्यक्ष बगालेका अनुसार जिल्लाबाट ४० भन्दा बढी डेयरीले दुध लैजाने गरेका छन् । ती डेयरीले भुक्तानी माग्दा दुध लैजान कम गर्ने गरेका हुन ।
उहाँले भन्नुभयो– ‘किसानले भुक्तानी माग्दा दुध उठाउन कम गर्छन् ।’
कतिपय डेयरीले नियमित लैजाने दुधबाट कटौती गरेर थोरै लैजान थालेको उहाँले जानकारी दिनुभयो ।
गत पुस १ गतेदेखिको भुक्तानी लिन बाँकी रहेको छ । यस्तै अवस्था आए दुग्ध उत्पादक किसान आन्दोलनमा आउन बाध्य हुने उहाँले बताउनुभयो ।
जिल्लाबाट दैनिक एक लाख ५१ हजार लिटर दुध बाहिर जाने गरेको सङ्घले जनाएको छ, जसमध्ये ३५ हजार लिटर दुध डिडिसीले लाने गरेको छ । अहिले जिल्लामा दैनिक ३ लाख लिटर बढी दुध उत्पादन हुँदै आएको छ ।
किसानको भुक्तानी दिन ढिला गरेपछि सङ्घले स्थानीय प्रशासनलाई भुक्तानीका लागि सहजीकरण गन आग्रह गरेका छन् ।
किसानको समस्या समाधानका स्थानीय प्रशासन समन्वय गर्न तयार रहेको प्रमुख जिल्ला अधिकारी प्रकाश पौडेलले बताउनुभयो । भुक्तानी दिन ढिला गर्ने उद्योगलाई सम्पर्क गरेर बोलाएर छलफल गरिने उहाँले बताउनुभयो । यस विषयमा गृहमन्त्रालय र कृषिमन्त्रालयसँग आफूले समन्वय गर्ने उहाँका भनाइ छ । (रासस)
