काठमाडौँ । नागढुङ्गा–सिस्नेखोला सुरुङमार्ग अगामी वर्ष सन् २०२६ को जनवरी १ देखि सञ्चालनमा आउने भएको छ ।
भौतिक पूर्वाधार तथा यातायातमन्त्री देवेन्द्र दाहालले सोमबार नागढुङ्गा–सिस्नेखोला सुरुङमार्गको अनुगमन गर्दै अगामी वर्ष सन् २०२६ को जनवरी १ देखि सुरुङमार्गलाई पूर्ण रुपमा सञ्चालनमा ल्याउने गरी काम भइरहेको जानकारी दिए।
आइतबार मन्त्रालयका सचिवसहितका उच्चस्तरीय अधिकारीसँगै मन्त्री दाहालले निर्मार्णाधिन सुरुङमार्गको अनुगमन तथा निरीक्षण गरेका हुन्।
सो अवसरका सञ्चारकर्मीहरूसँग कुरा गर्दै मन्त्री दाहालले नागढुङ्गा–सिस्नेखोला सुरुङमार्ग नेपालको गौरवको विषय भएको बताए।
उनले लामो समयको प्रतिक्षापछि सञ्चालनमा आउने तयारीमा रहेको सुरुङमार्गको सब–अपरेसनको काम अगामी कात्तिक ७ गतेदेखि सुरु गरिने उल्लेख गरे।
मन्त्री दाहालले भने, ‘हामी अगामी कात्तिक ७ गतेदेखि सामान्य सब–अपरेशनको काम चाहीँ शुरु गर्छौं। सिभिल वर्क अक्टोवर २५ मा सकिन्छ। त्यो काम सकिएपछि हामीलाई हस्तान्तरण हुन्छ। यसलाई पूर्णरुपमा अगामी वर्षको जनवरी १ देखि सुरु गर्ने भनेका छौँ। तर त्यसअघि नै हामीले सुरुङमार्ग सञ्चालनको लागि डेमो जस्तो गरेर यसलाई पूर्ण रुपमा सञ्चालनमा ल्याउनका लागि कामहरू गर्छौं।’
नेपालको सुरुङ युगको सुरुवात नागढुङ्गा–सिस्नेखोला सुरुङमार्गबाट गरिने मन्त्री दाहालको दाबी छ।
