प्रकाश थापामगर, काठमाडौँ ।
अखिल नेपाल किसान महासङ्घ (अप्फा) का अध्यक्ष भैरवराज रेग्मीले भूमि बैङ्कले भूमिहीनलाई जग्गा नदिने बताउनुभएको छ ।
नेपाल सरकारले २०८२र८३ को नीति तथा कार्यक्रममा भूमि बैङ्कको अवधारणा सामेल गरेपछि त्यसको विरोधस्वरूप आयोजित कार्यक्रममा मन्तव्य दिँदै उहाँले यस्तो अभिव्यक्ति दिनुभएको हो ।
२०८२ जेठ ४ गते आइतबार अनामनगरस्थित संवाद डबलीमा आयोजित पत्रकार सम्मेलनमा मन्तव्य राख्दै उहाँले साम्राज्यवादको नवउदारवादी नीतिअन्तर्गत भूमि बैङ्क आएको बताउनुभयो ।
भूमि बैङ्क भनेको बैङ्कमा नगद राख्ने वा झिक्ने जस्तो होइन, त्यो त न्यूनतम ४०–५० वर्षका लागि राख्ने कुरा हो’ उहाँले भन्नुभयो– ‘यसले भूमिमाथिको व्यक्तिगत स्वामित्व हरण हुन्छ । भूमि बैङ्कले भूमिहीनलाई जग्गा दिँदैन ।’
अध्यक्ष रेग्मीले भूमि बैङ्कले जमिनलाई वित्तीय वस्तुको रूपमा व्यवहार गर्ने बताउनुभयो ।
नेपालको बहुसङ्ख्या जनता किसान भएको बताउँदै उहाँले जमिनमाथि किसानको अधिकार सुनिश्चित गर्न भूमि बैङ्कको विरोध गर्नुको विकल्प नरहेको बताउनुभयो ।
खासगरी बहुसङ्ख्यक भूमिहीन, दलित, मध्यमवर्गीय, गरिब किसानले भूमि बैङ्कको विरोध गर्नुपर्ने उहाँको भनाइ थियो ।
किसानबिना देश नचल्ने बताउँदै उहाँले किसानका समस्यालाई सबैले महत्त्व दिएर उठाउनुपर्ने आवश्यकतामा जोड दिनुभयो ।
कार्यक्रमलाई सम्बोधन गर्दै अखिल नेपाल किसान महासङ्घ (क्रान्तिकारी केन्द्र) का अध्यक्ष चित्रबहादुर श्रेष्ठले भूमि बैङ्कको अवधारणालाई स्वीकार गर्ने हो भने देश नै निजीकरण हुने बताउनुभयो ।
स्वाभिमानी नेपालीले सोच्ने बेला आएको बताउँदै उहाँले भूमि बैङ्क देशभक्त नेपालीको पक्षमा नरहेको दाबी गर्नुभयो ।
क्रान्तिकारी किसान महासङ्घ नेपालका अध्यक्ष सीताराम तामाङले भूमि बैङ्कको मुद्दा देशभक्तिको मुद्दा भएको दाबी गर्नुभयो ।
भारत–पाकिस्तानको माझमा युद्ध भएको भए नेपालमा खाद्यान्नको हाहाकार हुने बताउँदै उहाँले भूमि बैङ्क अमेरिकालाई पोस्ने नीति भएको बताउनुभयो ।
अखिल नेपाल किसान महासङ्घका पूर्व अध्यक्ष बलराम सापकोटाले प्रधानमन्त्री केपी शर्मा ओलीले भूमि बैङ्कको पक्षमा टुप्पीदेखि पैतालासम्म लागेको अभिव्यक्ति दिनुभयो ।
उहाँले भन्नुभयो– ‘जब जब केपी शर्मा ओली सत्तामा आउँछन, भूमि बैङ्क पारित गर्न गर्न खोज्छन् । अहिले पनि उनले त्यसै गरिरहेका छन् ।’
अखिल नेपाल किसान यूनियनका इन्चार्ज लोकनारायण सुवेदीले भूमि बैङ्क नेपालका जग्गाजमिन विदेशीलाई सुम्पिने षड्यन्त्र भएको बताउनुभयो ।
भूमि बैङ्कको नीति लागु हुँदा सहकारीबाट किसानहरू ठगिएजस्तै हुने उहाँको धारणा थियो ।
कार्यक्रममा सांसदहरू मीना तामाङ र रणेन्द्र बरालीले पनि सम्बोधन गर्दै किसानको पक्षमा आफूहरूले आवाज उठाउने प्रतिबद्धता व्यक्त गर्नुभएको थियो ।
किसान महासङ्घ (क्रान्तिकारी केन्द्र) का नहेन्द्र खड्काको सञ्चालनमा अघि बढेको सो कार्यक्रमको अध्यक्षता किसान महासङ्घका अध्यक्ष वलदेव चौधरीले गर्नुभएको थियो ।
सञ्चालकले प्रेसवक्तव्य वाचन गर्नुभएको उक्त कार्यक्रममा छ किसान सङ्गठनका नेताकार्यकर्तासमेत बाक्लो उपस्थिति रहेको थियो ।
