कमल पौडेल, प्युठान ।
राष्ट्रिय जनमोर्चाका उपाध्यक्ष एवम् प्रवक्ता दुर्गा पौडेलले सत्ता सञ्चालकहरू भ्रष्ट हुँदा प्रतिगामी तत्वले फेरि टाउको उठाउने मौका पाएको बताउनुभएको छ ।
बुधबार प्युठानको बरौलामा सम्पन्न जागरण सभालाई सम्बोधन गर्दै उपाध्यक्ष पौडेलले नेताहरूको कु कृत्यका कारण जनता निराश भएको बताउनुभयो ।
‘सत्ताधारी दलका नेताहरू भ्रष्ट भए । उनीहरूको कुकृत्यका कारण जनता निराश छन्’ पौडेलले भन्नुभयो, ‘यो मौका छोपेर प्रतिगामी तत्ववहरूले फोरि टाउको उठाउन थालेका छन् ।’
पौडेलले जनताले लडेर ल्याएको लोकतान्त्रिक गणतन्त्रको रक्षा गर्न जनता आफैँ सजग हुनुपर्ने बताउनुभयो । उहाँले लोकतान्त्रिक गणतन्त्र जोगाउन संघीयता खारेजीमा जोड दिनुभएको थियो ।
राष्ट्रिय जनमोर्चाले प्रतिगमनको खतरा विरुद्धमा देशभरि सञ्चालन गरेको जनजागरण कार्यक्रम अन्तर्गत ऐरावती गाउँपालिकाको बरौलामा सभा सम्पन्न गरेको हो ।
कार्यक्रममा राजमो प्रदेश सल्लाहकार सुरेश थापाले मसानघाटमा पुगिसकेको राजतन्त्रलाई पुनः ल्याउन खोज्ने दिवा सपना मात्रै भएको उल्लेख गर्नुभयो ।
कार्यक्रममा राष्ट्रिय जनमोर्चाका केन्द्रीय सल्लाहकार कृष्णबहादुर खड्का, राजमो जिल्ला सचिव केशव आचार्य, ऐरावती गाउँपालिकाको उपाध्यक्ष तथा जिल्ला सल्लाहकार कृष्ण श्रेष्ठ, जनजाति सम्मेलनका केन्द्रीय सदस्य अर्जुन थापा, अखिल नेपाल युवा संघका जिल्ला सचिवालय सदस्य टिकाराम आचार्य, समत समाज ऐरावती गाउँ समितिका अध्यक्ष बसन्त सुनार लगायत नेता तथा कार्यकर्ताहरूको उपस्थिति रहेको थियो।
कार्यक्रममा रक्तिम सांस्कृतिक अभियानका कलाकारहरूले विभिन्न जनवादी गीत तथा नृत्य प्रस्तुत गरेका थिए ।
राजमो ऐरावती गाउँ समितिका अध्यक्ष चन्द्र रानाको अध्यक्षतामा सम्पन्न कार्यक्रमको सञ्चालन उमाराम आचार्यले गर्नुभएको थियो ।
