टेकराज भुसाल, नुवाकोट (अर्घाखाँची) ।
अर्घाखाँची जिल्लाको भूमिकास्थान नगरपालिका वडा नम्बर २ ढाकाबाङ झाक्रीशाला रङ्गशालामा भलिबल प्रतियोगिता सम्पन्न भएको छ ।
भूमिकास्थान–२ ढाकाबाङ देविकास्थान झाक्रीशाला टोल विकास संस्थाले वडास्तरीय खुल्ला पुरुष/महिला भलिबल प्रतियोगिता २०८२ वैशाख १७ गते आयोजना गरेको हो ।
अन्तरवडा स्तरीय खुल्ला पुरुष भलिबल प्रतियोगिताको उपाधि मालारानी गाउँपालिका–८ हंसपुरले जितेको छ भने महिला भलिबल प्रतियोगिताको उपाधि सन्धिखर्क नगरपालिका–२ ले जितेको छ ।
पुरुषतर्फको फाइनल खेलमा आयोजक देविकास्थान झाक्रीशाला टोल विकास संस्थालाई ३–० सोझो सेटमा पराजित गर्दै मालारानी गाउँपालिका ८ हंसपुरले उपाधि जितेको थियो ।
प्रतियोगितामा सहभागी पुरुष २४ टिममध्ये फाइनलमा हंसपुरसँग पराजित आयोजक देविकास्थान झाक्रीशाला टोल विकास संस्थाले दोस्रो स्थानमा चित्त बुझाएको छ भने भूमिकास्थान–४ धारापानी तेस्रो भएको छ ।
सोही दिन भएको महिलातर्फको फाइनल खेलमा भूमिकास्थान–५ असुरकोटलाई २–० सोझो सेटमा पराजित गर्दै सन्धिखर्क–२ ले उपाधि जितेको छ ।
प्रतियोगितामा सहभागी महिला १० टिममध्य फाइनलमा सन्धिखर्क–२ सँग पराजित भूमिकास्थान–५ ले दोस्रो स्थानमा चित्त बुझाएको छ भने आयोजक देविकास्थान झाक्रीशाला टोल विकास संस्था तेस्रो भएको छ ।
पुरुषतर्फ प्रथम स्थान हासिल गरेको मालारानी–८ हंसपुरले नगद रु २५ हजार, द्वितीय भएको आयोजकले नगद रु १५ हजार र तृतीय भएको भूमिकास्थान–४ धारापानीले नगद रु १० हजार, मेडल र प्रमाणपत्र प्राप्त गरेको छ ।
महिलातर्फ प्रथम स्थान हासिल गरेको सन्धिखर्क–२ ले नगद रु ८ हजार, द्वितीय भएको भूमिकास्थान–५ असुरकोटले नगद रु ५ हजार र तृतीय भएको आयोजकले नगद रु ३ हजार, मेडल र प्रमाणपत्र प्राप्त गरेको छ ।
भूमिकास्थान–२ का वडा अध्यक्ष बुद्धिबहादुर थापा, कार्यपालिका सदस्य केशरा परियार वडासदस्य नारायण खनाल, नगरस्तरीय युवा सञ्जाल भूमिकास्थानका संयोजक टेकराज भुसाल, विश्व मावि ढाकाबाङका शिक्षक जुमलाल खनाल र संस्थाका अध्यक्ष जितेन्द्र खत्रीले विजेता खेलाडी र टिमलाई सम्मानसहित पुरस्कृत गर्नुभयो ।
प्रतियोगिता समापन कार्यक्रममा बोल्दै वडाध्यक्ष बुद्धिबहादुर थापाले खेलकुदले समाज सुधारमा महत्त्वपूर्ण भूमिका निभाउने उल्लेख गर्दै खेलक्षेत्रको विकासमा सक्दो सहयोग गर्ने प्रतिबद्धता जनाउनुभयो ।
