काठमाडौँ । आन्दोलनमा रहेका चिकित्सकहरूले आज (मंगलबार) २७ औँ दिनमा पनि काठमाडौँमा प्रदर्शन गरेका छन् ।

गत चैत २१ गतेदेखि सेवा बहिष्कार गरेर सडकमा उत्रिएका आवासीय चिकित्सकहरूले आज माइतीघरदेखि बानेश्वरसम्म प्रदर्शन गरेका हुन् ।

उनीहरूले आठौँ तह (४८ हजार) बराबरको निर्वाह भत्ता दिने सुनिश्चितता नभएसम्म आन्दोलन फिर्ता नलिने अडान लिएका छन् ।

निजी मेडिकल कलेजका आवासीय चिकित्सकहरूको अत्यधिक श्रम शोषण हुने गरेकाले एक आवासीय चिकित्सकलाई हप्तामा ७२ घण्टाभन्दा बढी काममा लगाउन नहुने, वर्षको २८ दिन अनिवार्य बिदा दिनुपर्ने, किरिया बिदा र सुत्केरी बिदा आवश्यकताका आधारमा थप्नुपर्ने पनि उनीहरूले माग राखेका छन् ।