मनोज भट्ट ##

नेपालको वाम आन्दोलनमा का. सी.पी. मैनाली एउटा स्थापित नाम हो । उहाँ अहिले नेकपा (माले) को महासचिव हुनुहुन्छ । झापा आन्दोलनदेखि सी.पी. मैनाली एउटा समूहको नेतृत्व गर्दै आउनुभएको छ । त्यसैले नेपालको वाम आन्दोलनका लागि उहाँ अपरिचित हुनुहुन्न ।

२०८२ वैशाख ६ गते नागरिकन्युज डट कमले राजतन्त्रबारे का. सी.पी. को विचार “राजावादीलाई सीपीको सुझाव : काङ्ग्रेस र कम्युनिस्टभित्र पनि राजा मन पराउने धेरै छन्, गाली नगर्नुस्” भन्ने शीर्षकमा एउटा समाचारमार्फत् सार्वजनिक गरेको छ । समाचारको शीर्षकबाट स्पष्ट हुन्छ कि राजाबारे सी.पी. ले कुन प्रकारको सोचाइ राख्नुहुन्छ ? वैशाख ६ गते शनिबारका दिन राजधानीमा एउटा कथित राजावादी समूहले आयोजना गरेको कार्यक्रममा का. सी.पी. ले राजावादी आन्दोलनबारे आफ्नो धारणा राख्दै “काङ्ग्रेस र कम्युनिस्टभित्र पनि राजालाई मन पराउने धेरै छन्, गाली नगर्नुस्” भन्नुभएको थियो ।

अहिलेसम्म संस्थागत रूपमा वा व्यक्तिगत रूपमा काङ्ग्रेसको कुनै नेताले राजालाई मन पराएको कुरा सार्वजनिक भएको छैन । त्यसैगरी, वाम घटकभित्र सी.पी. ले भनेजस्तै घोषित रूपमा कुनै घटकले वा त्यसका नेताहरुले “राजालाई मन पराएको” दाबी गरेको पाइएको छैन । का. सी.पी. ले यो कुरा कसको हकमा भन्न खोज्नुभएको होला ? त्यसबारे थाहा पाउन उक्त कार्यक्रममा उहाँको थप अभिव्यक्तिमाथि ध्यान दिनुपर्ने हुन्छ ।

कथित राजावादी समूहले आयोजना गरेको सार्वजनिक कार्यक्रममा का. सी.पी. ले “अब २०८२ सालमा राजावादीको सफल आन्दोलन हुँदैछ” भन्ने दाबीसमेत गर्नुभएको छ अर्थात् राजाको शासनको पुनर्स्थापनाका लागि सञ्चालित आन्दोलनलाई विगतमा २००७ साल, २०४६ साल, २०६३ सालमा सफल भएका आन्दोलनसँग तुलना गर्दै जसरी २००७ साल, २०४६ साल, २०६३ सालको आन्दोलन सफल भयो, ठिक त्यसरी नै २०८२ सालमा राजावादीले चलाएको आन्दोलन “सफल” हुने दाबी र कामना गर्नुभएको छ ।

अहिलेसम्म घोषित रूपमा वामपन्थी वा काङ्ग्रेसमध्ये कसैले राजतन्त्रको पुनर्स्थापनाका लागि सञ्चालित आन्दोलनलाई सफल हुने शुभेच्छा प्रकट गरेका छैनन् बरु त्यसको विरोध नै गरेका छन् । राजावादीको यो कार्यलाई प्रतिगमनकारी कारबाहीको सङ्ज्ञा दिएका छन् तर का. सी.पी. उक्त आन्दोलन विगतमा सञ्चालित आन्दोलनजस्तै सफल हुने दाबी गर्नुहुन्छ ।

विगतका आन्दोलन निरङ्कुशता वा राजतन्त्रको अन्त्यका तथा लोकतान्त्रिक प्रणाली स्थापनाका लागि भएका थिए तर राजतन्त्र पुनर्स्थापनाका लागि सञ्चालित कारबाही आन्दोलन नभएर प्रतिआन्दोलन वा प्रतिगमनकारी कारबाही हो । त्यो प्रतिगमनकारी कारबाहीलाई सफल हुने दाबी गर्नु, अझ त्यसका लागि प्रतिगमनकारीलाई रणनीति सिकाउनुलाई के भनिन्छ ?

राजावादी आन्दोलन सफल हुन शुभेच्छा प्रकट गर्ने कुरासम्ममा मात्र उहाँको अभिव्यक्ति सीमित नरहेर राजावादी आन्दोलनलाई सफल पार्न कुन प्रकारको रणनीति अपनाउने ? त्योसमेत राजावादीलाई सहयोग गर्नुभएको छ । त्यो रणनीति भनेको काङ्ग्रेस, कम्युनिस्टभित्र राजा मन पराउने धेरै छन्, तिनको साथ पाउन काङ्ग्रेस र कम्युनिस्टलाई गाली नगर्नुस् भन्ने रणनीति हो ।

नागरिकन्युज डट कमले उक्त कुराको जवाफ दिँदै का. सी.पी. को त्यो कार्यलाई राजतन्त्रको पक्षमा उभिएको र राजतन्त्रको समर्थन गरेको बताएको छ । का. सी.पी. विद्यमान अवस्थामा राजाको शासनको पुनर्स्थापनाको पक्षमा वा विपक्षमा कुन कित्तामा हुनुहुन्छ भन्ने कुरा का. सी.पी. को विचारले नै स्पष्ट पारेको छ । त्यसैले का. सी.पी. को राजतन्त्रको पक्षमा दिएको अभिव्यक्ति तथा स्वीकारोक्तिलाई के भन्ने ? त्यो कुरा सचेत पाठकवर्गको जिम्मामा रहेको छ ।

यस्तो छ, नागरिक अनलाइनको समाचार

राजावादीलाई सिपीको सुझाव : कांग्रेस र कम्युनिष्टभित्र पनि राजा मन पराउने धेरै छन्, गाली नगर्नुस्