काठमाडौँ । नेकपा (मसाल) का केन्द्रीय प्रवक्ता रामप्रकाश पुरीले जनजाति पृष्ठभूमिका नेताले राजा मान्नु आश्चर्य भएको बताउनुभएको छ ।

राष्ट्रिय प्रजातन्त्र पार्टी ९राप्रपा० का नेता राजेन्द्र लिङ्देनतर्फ इङ्गित गर्दै उहाँले यस्तो अभिव्यक्ति दिनुभएको हो ।

२०८२ वैशाख ३ गते बुधबार कपनमा आयोजित जनजाति सम्मेलन र जातीय समता समाजको अड्तिसौँ संयुक्त स्थापना दिवसको कार्यक्रममा मन्तव्य राख्दै उहाँले भन्नुभयो–’जनजाति पृष्ठभूमिबाट आएका नेताले राजा मान्नु अचम्म छ ।’

जनजाति समुदायको सामूहिक जीवनपद्धति रहेको स्मरण गर्दै प्रवक्ता पुरीले भन्नुभयो–’जनजातिहरू समूह र सामुदायिक जीवनपद्धतिमा विश्वास गर्दछन् तर लिङ्देन भने राजा फर्काउने राजनीति लिएर अघि बढेका छन् ।’

देशमा यसरी जनजातिका केही व्यक्तिहरू प्रतिगमनको पक्षमा लागेको उहाँको भनाइ थियो ।

जनजाति आन्दोलनमा इसाईकरणको तीव्र प्रभावको पनि उहाँले चर्चा गर्नुभयो ।

‘म केही वर्षअघि रुकुमको तकसेरामा गएको थिएँ’ उहाँले भन्नुभयो– ‘त्यहाँका घरघरमा बाइबल देखेर मलाई आश्चर्य लाग्यो । त्यहाँ खामभाषामा बाइबल अनुवाद गरेर घरघरमा बाँडिएको रहेछ ।’

त्यस्तै, आरक्षणले आधारभूत रूपमा जातीय समस्याको समाधान दिन नसक्ने धारणा उहाँले राख्नुभयो ।

‘आरक्षणले आधारभूत रूपमै जनजाति र दलित समुदायको समस्या समाधान हुने छैन’ उहाँले भन्नुभयो–’फेरि पनि आवधिक रूपमा आरक्षण दिने नीतिलाई प्रगतिशील मान्नुपर्दछ ।’

नेपालको जातीय आन्दोलनमा एनजिओकरण र इसाईकरणको प्रभाव बढिरहेका बेला जनजाति सम्मेलन र समता समाज त्यो प्रभावबाट अछुतो रहनु सुखद विषय रहेको उहाँको विश्लेषण थियो ।

‘स्थापनाकालमा जनजाति र समता समाज वर्गीय राजनीतिलाई केन्द्रविन्दुमा राखेर स्थापना भएका थिए’ उहाँले भन्नुभयो– ‘अहिलेसम्म पनि स्थापनाकालको त्यही उद्देश्यमा अडिग रहेर परिचालन हुनु सुखद विषय हो ।’

उहाँले जनजाति सम्मेलन र समता समाजलाई बृहत् जनतामाझ पुगेर सङ्गठन निर्माण गर्न आग्र्रहसमेत गर्नुभयो ।