काठमाडौँ । जातीय समता समाजसहितको संयुक्त राजनीतिक दलित सङ्घर्ष समितिले राजावादी अराजक गतिविधिको विरोध गरेको छ ।
१२ ओटा दलित सङ्गठन सम्मिलित सङ्घर्ष समितिले २०८१ चैत १६ गते प्रेसविज्ञप्ति जारी गर्दै राजावादी अराजकताको विरोध गरेको हो ।
विज्ञप्तिमा केही समययता मुलुकमा देखा परेका प्रतिगामी हर्कतप्रति आफूहरूको ध्यानाकर्षण भएको बताउँदै चैत १५ गते राजावादीद्वारा काठमाडौँका तीनकुने, कोटेश्वर, जडिबुटीलगायतका क्षेत्रमा मच्याइएको अराजकताको विरोध गरिएको छ ।
विज्ञप्तिमा भनिएको छ– “यो उच्छृङ्खल र अराजक कार्यको हामी घोर भर्त्सना गर्दछौँ ।”
साथै विज्ञप्तिमा सो घटनामा संलग्न आपराधिक तथा आततायी तत्त्वलाई यथाशीघ्र कानुनी दायरमा ल्याई कडा कारबाही गर्दै यस्ता गतिविधि नियन्त्रण गर्न माग गरिएको छ ।
“जनतालाई रैती र दासमा परिणत गर्ने राजतन्त्रकालीन कहालीलाग्दो अन्धकारमय समयलाई हामीले बिर्सेका छैनौँ” विज्ञप्तिमा भनिएको छ– “दलितलगायत सबै उत्पीडित वर्ग, क्षेत्र र समुदायको हित जनताको बलमा विस्थापित भई चिहानमा पुगिसकेको पुरानो व्यवस्थाको पुनरावृत्तिले कदापि सम्भव छैन ।”
प्रतिगामी गतिविधिलाई दलित समुदायले नस्वीकार्ने बताउँदै विज्ञप्तिमा यस्ता गतिविधिमा संलग्न नहुन सम्पूर्ण जनसमुदायसित अपिल गरिएको छ ।
विज्ञप्तिमा जातीय समता समाजका अध्यक्ष राजेश विश्वकर्मा, नेपाल दलित सङ्घका अध्यक्ष लोकबहादुर विश्वकर्मा, नेपाल उत्पीडित जातीय मुक्ति समाजका अध्यक्ष मनोहर पौडेल विश्वकर्मा, नेपाल दलित मुक्ति मोर्चाका अध्यक्ष दलजित श्रीपाली, नेपाल दलित मुक्ति सङ्गठनका उपमहासचिव नन्दराज घतानी र श्रमिक समुदाय मोर्चाका अध्यक्ष रामलाल सीको हस्ताक्षर रहेको छ ।
त्यस्तै, वक्तव्यमा एकीकृत दलित मुक्ति मोर्चाका संयोजक टेकबहादुर विक, समाजवादी दलित मुक्ति सङ्गठनका महासचिव प्रदीप घतान, नेपाल समाजवादी दलित मुक्ति सङ्गठनका उत्प्रेरक गजाधर सुनार, समाजवादी दलित शिल्पी मुक्ति सङ्घका अध्यक्ष कमला विश्वकर्मा, नेपाल राष्ट्रिय दलित केन्द्रका अध्यक्ष उपेन्द्र छटुन्जेल र समाजवादी दलित मुक्ति मोर्चाका अध्यक्ष शिव वर्माको हस्ताक्षर रहेको छ ।
