ढोरपाटन (बागलुङ) । बागलुङका एक सय छ खानेपानी मुहानमा दिशामा पाइने जीवाणु (कोलिफर्म) भेटिएको छ ।
प्रदेश जनस्वास्थ्य कार्यालय बागलुङले जैमिनी नगरपालिका, काठेखोला गाउँपालिकासहित जिल्लाका १० स्थानीय तहका विभिन्न दुई सय ८५ स्थानमा कोलिफर्म परीक्षण गर्दा सो स्थिति देखिएको हो ।
सबैभन्दा बढी जैमिनी नगरपालिका र काठेखोला गाउँपालिकाको खानेपानीमा कोलिफर्म भेटिएको प्रदेश जनस्वास्थ्य कार्यालय बागलुङका प्रयोगशाला प्राविधिक डिल्ली आचार्यले जानकारी दिनुभयो ।
उहाँका अनुसार काठेखोलामा ४७ ओटा मुहानमा परीक्षण गरेकोमा २७ ओटा र जैमिनीमा एक सय छओटा मुहानमा परीक्षण गरेकामा ४४ ओटामा भेटिएको हो । परीक्षणको दायरा बढाए अझै धेरै मुहानमा कोलिफर्म भेटिन सक्ने आचार्यको भनाइ छ ।
जनस्वास्थ्य कार्यालयले जिल्लाको निसीखोला, तमानखोला, ताराखोला, बरेङ, बडिगाड गाउँपालिका, गलकोट नगरपालिका, ढोरपाटन र बागलुङ नगरपालिकाका खानेपानीमा कोलिफर्म परीक्षण गरिरहेको छ । धेरै ठाउँबाट परीक्षण गर्न आग्रह गरेकाले बिस्तारै सबै स्थानीय तहमा परीक्षण गरिने उहाँको भनाइ छ ।
आचार्यले भन्नुभयो– ‘हामीले जिल्लाको धेरै ठाउँमा पुगेर खानेपानीको मुहान परीक्षण गर्दा कोलिफर्म फेला परेको छ । कोलिफर्म भएको पानी पिउनका लागि उपयुक्त हुँदैन । यस्तो पानी पिउँदा झाडापखाला, हैजा, टाइफाइड, जन्डिस, हेपाटाइटिस बीलगायत पानीजन्य रोग लाग्छ । त्यसले गर्दा जनस्वास्थ्य कार्यालयले जनचेतनामूलक कार्यक्रम गरिरहेको छ ।’
जैमिनी नगरपालिकाका उपप्रमुख हरिहर शर्माले पालिकाले वास प्लान बनाएको र सोहीअनुसार मुहान सरसफाइ र संरक्षणमा लाग्ने बताउनुभयो । कोलिफर्म देखिएको मुहानलाई व्यवस्थित गरी आम नागरिकलाई पानी शुद्धीकरण गरेर मात्रै प्रयोग गर्न जनचेतना फैलाउने उहाँको भनाइ छ ।
‘कोलिमर्फ नियन्त्रणका लागि नगरपालिकाबाट हुने प्रयास गर्छौँ । अन्य निकायबाट प्राविधिक सहयोग लिन्छौँ । कोलिफर्मबाट पर्ने असरबाट बच्न आम नागरिकलाई सचेत बनाउँछौँ’ उपप्रमुख शर्माले भन्नुभयो– ‘धेरै मुहानमा कोलिफर्म भेटिएकाले पानी शुद्धीकरण गरेर मात्रै प्रयोग गर्नुपर्ने हुन्छ, यसप्रति हामी गम्भीर भएका छौँ ।’ (रासस)
