काठमाडौँ । पूर्वराजा ज्ञानेन्द्र शाहले काठमाडौँ महानगरपालिकाले पठाएको जरिवाना पत्र बुझ्न नमानेपछि महानगरले हुलाकबाट पठाउने भएको छ ।
पत्र बुझाउन निर्मल निवास पुगेको टोली ज्ञानेन्द्रले पत्र नबुझेपछि त्यसै फर्किएको छ।
चैत १५ गते काठमाडौँको तीनकुनेमा राजावादीले गरेका फोहोर र तोडफोडका प्रमुख योजनाकार पूर्वराजा शाह नै भएको ठहर गर्दै काठमाडौँ महागरपालिकाले उनले झन्डै ८ लाख जरिवाना तिर्नुपर्ने निर्णय गरेको छ।
सोहीबारेको पत्र लिएर आइतबार बिहान निर्मल निवास पुगेको काठमाडौँ महानगरपालिकाको टोली ज्ञानेन्द्रले लिन नमानेपछि त्यसै फर्किएको महानगरले जनाएको छ ।
प्रदर्शनकारीले क्षतिग्रस्त पारेका महानगरको क्षेत्राधिकारमा पर्ने संरचनाको विवरण संकलन गरेर टोली फर्कियो। प्राविधिक सहितको सो टोलीले प्रतिवेदन बुझाएपछि ज्ञानेन्द्रलाई ७ लाख ९३ हजार जरिवाना तोकिएको हो।
निजी सम्पत्ति र प्रदेश तथा संघीय सरकारको क्षेत्राधिकारमा पर्ने खालका सम्पत्तिमा पुगेको क्षतिको आकलन गृह मन्त्रालयले गर्ने विश्वास महानगरले लिएको छ।
सडक र पेटीहरु फोहोर पारेको, बगैँचाहरू बिगारेको, बोटविरूवा फूलहरू नासिएको आधारमा महानगरको टोलीले क्षति मूल्यांकन गरेको थियो।
