काठमाडौँ । नेपाल पत्रकार महासङ्घले पत्रकार सुरेश रजकको योजनाबद्ध ढङ्गले हत्या भएको ठहर गरेको छ ।
शुक्रबार राजावादी आन्दोलनका क्रममा जलेर मृत्यु भएका पत्रकारको योजनाबद्ध हत्या भएको महासङ्घले विज्ञप्तिमार्फत उल्लेख गरेको हो ।
२०८१ चैत १६ गते शनिबार बसेको महासङ्घको उपलब्ध केन्द्रीय समितिको आकस्मिक बैठकले पत्रकार रजकको हत्या तथा सञ्चारगृह तथा पत्रकारमाथि गरिएको आक्रमण तथा आगजनीको विरोधमा थप आन्दोलनका कार्यक्रम तय गरेको छ ।
महासचिव रामप्रसाद दाहालद्वारा जारी विज्ञप्तिमा भनिएको छ– नेपाल पत्रकार महासङ्घको शनिबार बसेको उपलब्ध केन्द्रीय समितिको आकस्मिक बैठकले पत्रकारको योजनाबद्ध हत्या र सञ्चारगृह तथा पत्रकारमाथि गरिएको आक्रमण तथा आगजनीको विरोधमा थप आन्दोलनका कार्यक्रम तय गरेको छ ।
बैठकले शनिबार क्षति पुऱ्याइएका सञ्चारगृहको अनुगमन र घाइते सञ्चारकर्मी र सञ्चार सामग्रीको विवरण सङ्कलन गर्ने, आइतबार कार्यस्थलमा कालोपट्टी बाँधेर काम गर्न सबै सञ्चारकर्मीलाई आह्वान गर्ने, सोमबार केन्द्रीय समिति, प्रदेश समिति र शाखामार्फत नेपाल सरकारलाई ज्ञापनपत्र बुझाउने र मङ्गलबार सरोकारवाला सङ्गठनसँग छलफल गर्ने निर्णय गरेको छ ।
त्यस्तै, मारिएका पत्रकार सुरेश रजकसम्बद्ध सञ्चारगृह, उनको परिवारसँग छलफल गरी प्रतिवेदन तयार पार्न उपाध्यक्ष उमिदप्रसाद बागचन्दको नेतृत्वमा सचिवहरू रमेश खतिवडा, सोनी शर्मा, प्रकाश धौलाकोटी र वैकुण्ठराज पराजुली संलग्न रहेको समिति गठन गरिएको छ ।
पत्रकार रजकलाई न्याय माग्दै देशभर प्रदर्शन
महासङ्घले हिजो राजावादीको नाममा भएको आन्दोलनमा सहभागी अराजक समूहले लगाएको आगोमा जलेर एक जना पत्रकारको मृत्यु भएको, विभिन्न मिडिया हाउसमा आगजनी र तोडफोड गरिएको, पत्रकार घाइते भएको र सञ्चाार सामग्री हराएको घटनाको विरोधमा महासङ्घले आज देशव्यापी विरोध प्रदर्शन गरेको जनाएको छ ।
आन्दोलनका थप कार्यक्रम अवस्थाको विश्लेषणपछि तय गरिने महासङ्घले जनाएको छ ।
