काठमाडौँ । काठमाडौँमा आज राजावादी तथा समाजवादी मोर्चाले एकै दिन शक्ति प्रदर्शन गरिरहेका छन् । चार दलीय समाजवादी मोर्चा र राजावादीले आज छुट्टाछुट्टै प्रदर्शन गरेका हुन् ।
राजावादीहरूले वर्तमान व्यवस्थाको विरुद्धमा राजतन्त्र र हिन्दू अधिराज्य पुनर्थापनाको माग सहित प्रदर्शन गरेका हुन् भने समाजवादी मोर्चाले गणतन्त्र रक्षाका लागि भन्दै प्रदर्शन गरिरहेका छन् ।
माओवादी केन्द्र, नेकपा एकीकृत समाजवादी, नेपाल समाजवादी पार्टी र विप्लव नेतृत्वको नेकपा आवद्ध समाजवादी मोर्चाले सरकारका गलत क्रियाकलापको विरुद्धमा र गणतन्त्रको पक्षमा भएको बताएको छ ।
समाजवादी मोर्चाले भृकुटीमण्डपस्थित प्रदर्शनीमार्गमा र राजावादीले तीनकुनेमा कार्यक्रम गर्ने तयारी गरेका छन्।
दुई समूहबीच भेट हुन नदिन स्थानीय प्रशासनले राजावादी समूहलाई रिङरोडभित्र प्रवेशै गर्न नदिने तयारी गरेको छ। चार दलीय समाजवादी मोर्चाले भने रिङरोडभित्रका विभिन्न क्षेत्रबाट जुलुश प्रदर्शन गर्दैछन्।
दुर्गा प्रसाइँ नेतृत्वको राजावादीहरुको जुलुस रिङरिोड बाहिरी क्षेत्रबाट तीनकुनेमा पुगेर सभामा परिणत भएको छ।
गणतन्त्रवादी र राजावादीको शक्ति प्रदर्शनलाई ध्यान दिएर सरकारले काठमाडौँमा सुरक्षा व्यवस्था कडा बनाएको छ। ठूलो संख्यामा सुरक्षाकर्मी र ट्राफिक प्रहरी परिचाल परिचालन गरिएको छ।
गणतन्त्रवादी र राजावादीले प्रदर्शन गर्ने क्षेत्रमा बिहानैदेखि सवारी आवागमतमा समस्या देखिएको छ। सवारी सञ्चालन हुने कतिपय रुटहरू बन्द गरिएका छन्।
जसका कारण सवारी आवागमनमा बिहानैदेखि समस्या सिर्जना हुँदा यात्रुले सास्ती पाएका छन्।
