काठमाडौँ । त्रिभुवन विश्वविद्यालयले विभिन्न भोलि (चैत ५ गते) हुने स्ववियु चुनावको प्रक्रिया स्थगित गरेका क्याम्पसहरूलाई स्पष्टीकरण सोधेको छ ।
त्रिवि शिक्षाध्यक्षको कार्यालय, विद्यार्थी कल्याण तथा खेलकुद निर्देशनालयले ६ वटा क्याम्पसलाई पत्र लेख्दै निर्वाचन प्रकृया अगाडि बढाउन भनेको छ ।
विश्वविद्यालय क्याम्पस, कीर्तिपुर, सरस्वती बहुमुखी क्याम्पस, सोह्रखुट्टे, पब्लिक युथ क्याम्पस, धोविचौर, शंकरदेव क्याम्पस, पुतलीसडक,
नेपाल ल क्याम्पस, प्रदर्शनीमार्ग र विश्वभाषा क्याम्पस, प्रदर्शनीमार्गलाई त्रिविले स्ववियु निर्वाचनको प्रक्रिया अघि बढाउन निर्देशन दिएको हो ।
‘त्रिभुवन विश्वविद्यालयका सबै आङ्गिक तथा सम्बन्धन प्राप्त क्याम्पसहरूमा चैत्र ५ गते स्ववियु निर्वाचन कार्य सम्पन्न गर्नुपर्नेमा त्यस क्याम्पसमा के कति कारणले स्ववियु निर्वाचन हुन नसकेको हो ? त्यस क्याम्पसका सम्बद्ध पक्षसँग समझदारी कायम गरी जुन अवस्था र प्रकृयामा रोकिएको हो सोही अवस्था र प्रकृयाबाट स्ववियु निर्वाचन कार्य तत्कालै अगाडि बढाउन निर्देशन गरिन्छ’ त्रिभुवन विश्वविद्यालय स्व.वि.यु निर्वाचन केन्द्रीय अनुगमन तथा समन्वय समितिका सदस्य सचिव प्रा। पशुपति अधिकारीले पठाएको पत्रमा उल्लेख छ।
त्रिविका आंगिक ६२ सहित सामुदायिक र निजी एक हजार ४० क्याम्पसमा चैत ५ गते स्ववियु चुनाव हुने तय भएको थियो। देशभरका क्याम्पसमा प्रत्यक्ष र समानुपातिक प्रणालीका आधारमा स्ववियु निर्वाचन हुँदैछ।
