काठमाडौँ । आसन्न चैत ५ गते हुने स्ववियु निर्वाचनमा पुल्चोक क्याम्पस ललितपुरमा सपना बन्जाडेको प्रत्यक्ष सदस्य पदमा उम्मेदवारी परेको छ ।
भूमिकास्थान नगरपालिका वडा नं. ६ खिल्जीमा जन्म भई हाल पुल्चोक क्याम्पस ललितपुरमा ब्याचलर इन सिभिल इन्जिनियरिङ तेस्रो वर्ष (छैठौं सेमेस्टर) मा अध्ययनरत वन्जाडे प्रतिभावान विद्यार्थी हुनुहुन्छ । सानैदेखि सामाजिक भावनाले प्रेरित बन्जाडे एम्नेस्टी इन्टरनेसनल, पुलचोक क्रिकेट क्लब, सिइएसएस नेपाल र काठमाडौँ भ्याली लियो क्लबजस्ता सामाजिक सङ्घ संस्थामा आबद्ध भएर योगदान दिनुभएको छ ।
सपना बन्जाडे पुल्चोक क्याम्पसमा ऋषभ गिरी नेतृत्वको प्यानलबाट सदस्य पदमा उम्मेदवार हुनुहुन्छ । प्यानलको सचिवमा अर्जुन तिम्सिना र कोषाध्यक्षमा रूपेश भट्टराई उम्मेदवार रहनुभएको छ । उक्त प्यानललाई अखिल (छैठौं) को समर्थन रहेको छ ।
उहाँले आफूलाई मतदान गर्न क्याम्पसका सबै विद्यार्थीलाई अनुरोध गर्दै भन्नुभयो– ‘गत तीन वर्षको दौरानमा मैले पुल्चोक क्याम्पसमा विभिन्न सङ्गठनहरूसँग संलग्न भएर सिकाइ, विकास र सकारात्मक परिवर्तनको लागि काम गरेँ । सिइएसएस नेपाल, काठमाडौँ भ्याली लियो क्लब, एम्नेस्टी इन्टरनेसनल र पुल्चोक क्रिकेट क्लबमा आबद्ध भएर गरेको कामले मलाई अरूको कुरा सुन्ने, उचित निर्णय लिने र प्रभावकारी परिणाम दिन सक्ने नेतृत्वकर्ताको रूपमा विकास गराएको महसुस भएको छ ।’
उहाँले अगाडि भन्नुभयो– ‘मैले छोरीका लागि क्रिकेट प्रतियोगिता आयोजना गर्नेदेखि सामाजिक कार्यमा लियो क्लबमार्फत स्वयम्सेवा गर्ने, एम्नेस्टी इन्टरनेसनलसँग मिलेर मानवअधिकार उल्लङ्घनको विरुद्ध आवाज उठाउने र सिइएसएस नेपालमा समन्वयकको भूमिकामा रहेर विद्यार्थी हितमा काम गर्ने, निरन्तर विद्यार्थीलाई सशक्त बनाउने र सकारात्मक प्रभाव पार्ने प्रयास गरिरहेकी छु ।’
‘नेतृत्व शब्दमा मात्र सीमित हुँदैन, यो कार्यमा आधारित हुनुपर्छ । यी क्लबमा मेरा अनुभवमार्फत मैले प्रभावकारी कार्यक्रम आयोजना गर्ने, विद्यार्थी समस्यालाई सम्बोधन गर्ने र हाम्रो क्याम्पसमा सार्थक परिवर्तन ल्याउन योगदान दिने प्रयत्न गरेकी छु’ उहाँको अपिलमा भनिएको छ– ‘अब म यो प्रतिबद्धतालाई नयाँ स्तरमा लैजान चाहन्छु । तपाईंहरूको समर्थनसँगै म विद्यार्थीको आवाज बुलन्द बनाउने, समस्या समाधान गर्ने र हाम्रो क्याम्पसलाई अझ समृद्ध बनाउने प्रयत्न गर्दछु । त्यसका लागि मलाई तपाईंहरुको अमूल्य मतको आवस्यकता छ ।’
