खलङ्गा । अखिल नेपाल शिक्षक सङ्घ प्युठानको पाँचौँ जिल्ला सम्मेलन २०८१ चैत २ गते शनिबार पुन्यखोला प्युठानमा सम्पन्न भएको छ ।
शिक्षक सङ्घका महासचिव चक्रपाणि पौडेलको प्रमुख आतिथ्यमा सो सम्मेलन सम्पन्न भएको हो ।
सम्मेलनमा मन्तव्य राख्दै उहाँले समाजको सबैभन्दा बौद्धिक र समाजलाई उज्यालो छर्ने वर्ग शिक्षक भएकोले आफूलाई गर्व गर्न आग्रह गर्नुभयो ।
सम्बोधनको क्रममा उहाँले सरकारले शिक्षकलाई अपमान गरिरहेकाले त्यसको विरुद्ध एक हुन सबैसित आग्रह गर्नुभयो ।
त्यस्तै, उहाँले शिक्षकले पटकपटक आन्दोलन गरे पनि सरकारले माग पूरा गर्न नसकेको विचार व्यक्त गर्नुभयो ।
शिक्षक महासङ्घ र सरकारबिच विगतमा भएका सम्झौता र शिक्षा विधेयक अहिलेसम्म ल्याउन नसक्नु सरकारको लाचार प्रवृत्ति भएको बताउनुभयो ।
उहाँले शिक्षामा कम्तीमा २० प्रतिशत लगानी गर्नु सके मात्र शिक्षा क्षेत्रमा देखिएका समस्या समाधान र गुणस्तरीय शिक्षा दिन सकिने उल्लेख गर्नुभयो ।
शिक्षक सङ्घका संस्थापक सदस्य तथा राष्ट्रिय जनमोर्चा लुम्बिनी प्रदेशका अध्यक्ष बोमबहादुर खत्रीले शिक्षकको आन्दोलनका कारण केही माग प्राप्त गर्न सकेको उल्लेख गर्दै शिक्षकहरू जायज मागको लागि एक भएर अगाडि बढ्न आग्रह गर्नुभयो ।
शिक्षकका मागप्रति आफ्नो पार्टीको सधैँ साथसहयोग रहेको उहाँको भनाइ थियो ।
खत्रीले भन्नुभयो– ‘देशको अवस्था अत्यन्तै कमजोर छ । देशका शासकहरू राष्ट्रियता र राष्ट्रप्रति उत्तरदायी बन्न नसक्दा समस्या बढेको छ ।’
देश सबै किसिमले कमजोर हुँदै गएको अवस्थामा शिक्षकले रचनात्मक खबरदारी गर्नसमेत आग्रह गर्नुभयो ।
राजमो केन्द्रीय सदस्य कृष्ण खड्काले शिक्षकले बालबालिकालाई शिक्षा दिएर उज्यालो दिने बौद्धिक वर्ग भएको दाबी गर्नुभयो ।
उहाँले देशको आमूल परिवर्तनमा शिक्षकको अहम् भूमिका रहँदै आएको बताउनुभयो ।
शिक्षक सङ्घका केन्द्रीय सचिव बालाराम पोख्रेल, नेपाल शिक्षक महासङ्घ प्युठानका निवर्तमान अध्यक्ष शेरबहादुर थापा, राजमो प्युठानका अध्यक्ष ज्ञामुराम न्यौपाने, शिक्षक सङ्घका पूर्व जिल्ला अध्यक्ष सिद्विमान जिसीलगाएतले शुभकामना दिनुभएको थियो ।
अध्यक्षमा खड्का
सम्मेलनले कल्याण खड्का अध्यक्ष रहनुभएको ३९ सदस्यीय जिल्ला समिति चयन गरेको छ ।
समितिको उपाध्यक्ष ध्रुव गिरी, महिला उपाध्यक्ष देवा विष्ट, सचिवमा शङ्करबहादुर बस्नेत, सहसचिवमा लुइस्याङ्जी केसी र कोषध्यक्ष महेन्द्रबहादुर केसी रहनुभएको छ ।
त्यस्तै, सम्मेलनले सङ्घको केन्द्रीय प्रतिनिधिमा अर्जुनबहादुर केसी, डम्बरबहादुर जिसी, कल्पना थापा, खेमराज पोख्रेल, कर्णबहादुर जिसी, वेदराज ज्ञावली, खुमबहादुर पुन र सृजना पोख्रेल रहनुभएको छ ।
अर्जुनबहादुर केसीको अध्यक्षतामा भएको कार्यक्रमको सञ्चालन सचिव ध्रुव गिरीले गर्नुभएको थियो ।
