काठमाडौँ । अन्तर्राष्ट्रिय नेपाली एकता समाजले अमेरिकाबाट अवैध आप्रवासीको नाममा फिर्ता पठाइएका नेपालीको सन्दर्भमा मानवअधिकार उल्लङ्घन भएको निष्कर्ष निकालेको छ ।
अध्यक्ष शक्तमान बुढाथोकीको हस्ताक्षरमा २०८१ फागुन २६ गते सोमबार जारी प्रेसवक्तव्यमा समाजले सो निष्कर्ष निकालेको हो ।
आप्रवासीका बारेमा निर्णय गर्ने अमेरिकाको अधिकार भए पनि उनीहरू फिर्ता पठाउने सन्दर्भमा व्यक्त भएको रवैयालाई समाजले मानवअधिकारको उल्लङ्घन बताएको छ ।
वक्तव्यमा आप्रवासी फिर्ताले नेपालमा मानव तस्करी गम्भीर रूपमा विद्यमान रहेको बताउँदै त्यसका लागि जिम्मेवारी सरकारी निकायका व्यक्तिलाई समेत छानबिनको दायरामा ल्याउनुपर्ने आवश्यकतामा जोड दिइएको छ ।
यस्तो छ, प्रेसवक्तव्यको पूर्ण पाठ :
अमेरिकाको राष्ट्रपतिमा डोनाल्ड ट्रम्प निर्वाचित भएपछि अवैध रूपमा त्यहाँ रहेका विदेशी आप्रवासीलाई फिर्ता पठाउने सिलसिलामा कैयौँ नेपाली पनि फिर्ता भएका छन् । त्यसै सन्दर्भमा २०८१ फागुन २१ गते एक महिलासँगै ८ जना नेपालीलाई नेपाल फिर्ता गरिएको छ । आफ्नो देशमा रहेका आप्रवासीको बारेमा निर्णय गर्ने अधिकार अमेरिकासँग पनि भएको आफैमा स्पष्ट छ तर त्यसरी फिर्ता पठाउने सवालमा जुन तरिका अपनाइएको छ, त्यसबारे अन्तर्राष्ट्रिय नेपाली एकता समाजको गम्भीर ध्यान आकर्षण भएको छ ।
सञ्चारमाध्यमबाट प्राप्त जानकारीअनुसार अमेरिकाबाट नेपाल फिर्ता गर्ने क्रममा ती आप्रवासी नेपालीलाई हत्कडी र नेल लगाइएको थियो ।
यस खालको क्रियाकलाप अन्तर्राष्ट्रिय मानवअधिकारको विपरीत भएको स्पष्ट छ । अमेरिकाको यस्तो क्रियाकलापबाट उसको कथित लोकतान्त्रिक चरित्र उदाङ्गो भएको छ । विदेशी नागरिकसित गरिएको त्यस प्रकारको क्रियाकलापबाट मानवअधिकारको उल्लङ्घन भएको निष्कर्षका साथ हामी सो क्रियाकलापको विरोध गर्दछौँ ।
हालसम्म अमेरिकाबाट ३७ जना नेपाली अवैध आप्रवासीको रूपमा नेपाल फिर्ता भएका छन् । यसबाट नेपालबाट ठुलो सङ्ख्यामा मानव तष्करी भइरहेको स्पष्ट हुन्छ । यसरी प्र्रतिव्यक्ति लाखौँ रुपियाँ लिएर सङ्गठित रूपमा मानव तष्करी गरिनु गम्भीर चिन्ताको विषय हो ।
आखिर राज्यका निकायको दुरुपयोगबिना यस खालका क्रियाकलाप सम्पन्न हुन सक्दैनथ्यो । त्यसैले यस विषयमा उच्चस्तरीय छानबिन गरेर मानव तष्करीमा सामेल सम्बन्धित व्यक्तिरसंस्थाका साथै राज्यको निकायका व्यक्तिसमेतलाई कानुनको सीमाभित्र ल्याउनुपर्ने र उनीहरूलाई पनि कानुनअनुसार कारबाही हुनुपर्ने आवश्यकतामा हाम्रो समाजले जोड दिन्छ ।”
