काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभा सांसद राजेश विश्वकर्मा (तुलप्रसाद) ले देशमा यतिखेर राजावादीहरूले गणतन्त्रमाथि धावा बोल्ने काम भइरहेको बताउनुभएको छ ।
२०८१ फागुन २५ गते आइतबार राष्ट्रियसभा बैठकमा विशेष समय लिएर बोल्दै सांसद विश्वकर्माले सो माग गर्नुभएको हो ।
‘संसारमा राजतन्त्र उहिल्यै मरिसकेको थियो । नेपालमा दुई दशकअघि नै फ्याँकिसकिएको थियो’ उहाँले भन्नुभयो– ‘अहिले त्यही मरिसकेको राजतन्त्रलाई फर्काउने प्रयास भइरहेको छ । यतिखेर राजावादीद्वारा गणतन्त्रमाथि धावा बोल्ने काम भइरहेको छ ।’
उहाँले यतिखेर सडकमा राजा फर्काउने चर्को आवाज उठिरहेकोमा गम्भीर हुन सरकारसित आग्रह गर्नुभयो ।
‘गणतन्त्रको विकल्प कुनै पनि हालतमा राजतन्त्र हुन सक्दैन’ उहाँको निष्कर्ष थियो ।
मन्तव्यको क्रममा उहाँले राजतन्त्र पुनर्स्थापनाको आवाज उठ्नुका पछाडि सरकारको कुशासन नै जिम्मेवार रहेको बताउनुभयो ।
‘देशमा महँगी, बेथिति, कुशासन, भ्रष्टाचारजस्ता समस्याले गर्दा राजावादीहरूले टाउको उठाउने मौका पाए’ उहाँको भनाइ थियो–’सरकार सचेत हुनुपर्दछ । सरकार देशमा सुशासन कायम गर्नमा चुकेको छ ।’
उहाँले जनताको आवश्यकता र चाहना पूरा गर्नेतर्फ लाग्न सरकारसित आग्रह गर्नुभयो ।
फरक विषय उठाउँदै उहाँले सङ्घीयताका कारण पनि देशको अवस्था कमजोर हुँदै गएको बताउनुभयो ।
‘सङ्घीयता खर्चिलो छ । देशले यतिखेर थप सातओटा सरकार पाल्नुपरिरहेको छ’ उहाँले भन्नुभयो– ‘सङ्घीयता फालौँ, प्रदेश सरकार पाल्न गरिएको खर्च बचाएर शिक्षा र स्वास्थ्य निःशुल्क बनाऔँ । जनताको दैनिक जीवन सहज बनाऔँ ।’
सांसद विश्वकर्माले अरू कसैले बोकाएको सङ्घीयताको भारी नबोक्न र अब भारी बिसाउन आग्रह गर्नुभयो ।
त्यस्तै, उहाँले शिक्षकसितको सम्झौता कार्यान्वयन नभएकाले उनीहरू सडकमा आएको विषय उठाउनुभयो ।
‘कति बेलासम्म शिक्षकलाई हामीले सडकमा आउन बाध्य पार्ने रु’ उहाँले प्रश्न गर्नुभयो ।
देशमा भविष्यका कर्णधार उत्पादन गर्ने शिक्षकका समस्या तत्कालै समाधान गर्नुपर्ने आवश्यकतामा उहाँले जोड दिनुभयो ।
