बार्सिलोना । स्पेनस्थित चार नेपाली सङ्गठनहरूले लिम्पियाधुरा, कालापानी र लिपुलेक फिर्ता गर्न भारतसित माग गरेका छन् । भारतीय प्रधानमन्त्री नरेन्द्र मोदीको नाममा स्पेनस्थित भारतीय राजदूतावास मार्फत् ज्ञापनपत्र पठाउँदै उनीहरूले यस्तो माग गरेका हुन् ।
मे २६, २०२० का दिन प्रेषित ज्ञापनपत्रमा उनीहरूले भारतसित सार्वभौमसत्तासम्पन्न राष्ट्र नेपालसित समानतापूर्ण व्यवहार गर्दै नेपालको भौगोलिक अखण्डता र द्विपक्षीय लाभ तथा सम्मानको आधारमा सम्बन्ध कायम गर्न माग गरेका छन् । १८१६ को सुगौली सन्धि नै नेपाल र भारतको पश्चिमी सीमा भएको उल्लेख गर्दै उनीहरूले भनेका छन्– ‘त्यो सन्धिअनुसार लिम्पियाधुरा, कालापानी, लिपुलेक नेपालकै हुन्छ ।’ उनीहरूले अगाडि भनेका छन्– ‘अप्रैल २४, १८५६ को नक्साले पनि यो भूमि नेपालकै भएको ठहर्छ ।’ उनीहरूले भारत सरकारसित नेपाल सरकारसित उच्चस्तरीय राजनीतिक तहमा छलफल गरे सीमा समस्या तत्कालै समाधान गर्न पनि आग्रह गरेका छन् ।
ज्ञापनपत्रमा स्पेन नेपाली एकता समाजका अध्यक्ष दुर्गा शर्मा, गैरआवासीय नेपाली सङ्घ स्पेनका अध्यक्ष दिनेश गुरुङ, नेपाली जनसम्पर्क समिति स्पेनका अध्यक्ष ईन्द्रप्रसाद शर्मा र प्रवासी नेपाली एकता मञ्च स्पेनका अध्यक्ष हेम सेर्पाको हस्ताक्षर रहेको थियो । ।
यसअघि, बार्सिलोनामा यसै विषयलाई लिएर सभा सम्पन्न भएको थियो । गैरआवासीय नेपाली सङ्घका अध्यक्ष देउ गुरुङको अध्यक्षता तथा सोही संस्थाका महासचिव राज ढकालको सञ्चालनमा अघि बढेको सो सभामा स्पेन नेपाली एकता समाजका अध्यक्ष दुर्गा शर्मा, प्रवासी नेपाली एकता मञ्च स्पेनका अध्यक्ष हेम सेर्पा, नेपाली जनसम्पर्क समिति स्पेनका अध्यक्ष ईन्द्रप्रसाद शर्मा र गैरआवासीय नेपाली सङ्घ अन्तर्राष्ट्रिय समन्वय परिषदका सदस्य चिन्तामणि सापकोटाले सम्बोधन गर्नुभएको दुर्गा शर्माले जानकारी गराउनुभयो ।
