तौलिहवा । कपिलवस्तुको शिवराज–३ खरेन्द्रपुर र शिवराज–४ समितिचोकमा सङ्घीयताको विरुद्धमा सभा सम्पन्न भएको छ ।
राजमो शिवराज नगर समितिको आयोजनामा २०८१ फागुन १७ गते शनिबार सो कार्यक्रम सम्पन्न भएका हुन् ।
आगामी चैत २४ देखि ३० गतेसम्म राजमोद्वारा घोषित सङ्घीयता विरुद्ध काठमाडौँकेन्द्रित आन्दोलन सफल पार्न जनभेटघाट र आर्थिक अभियानको दौरानमा सो कार्यक्रम गरिएको राजमोले जानकारी दिएको छ ।
खरेन्द्रपुरको कोणसभालाई सम्बोधन गर्दै राजमो कपिलवस्तुका सचिव केरसिंह अदैले नेपालमा सङ्घीयता व्यावहारिक रूपमा नै असफल भएको बताउनुभयो ।
‘सत्ताधारी पार्टीहरूले बेलैमा बुद्धि पुऱ्याएर खारेज गर्नुपर्दछ’ उहाँले भन्नुभयो– ‘सङ्घीयता खारेज गर्न जति ढिलो हुन्छ, त्यसको दुष्परिणामले गणतन्त्र र धर्मनिरपेक्षतासमेत धरापमा पर्नेछ ।’
त्यसैगरी, समितिचोकमा भएको कोणसभालाई सम्बोधन गर्दै राजमो कपिलवस्तुका कोषाध्यक्ष तथा शिवराज नगर समिति अध्यक्ष केहरसिंह पुनमगरले जनताद्वारा सङ्घीयता अस्वीकृत भइसकेको हुँदा तत्काल खारेज गर्नुपर्ने धारणा राख्नुभयो ।
कार्यक्रममा रक्तिम सांस्कृतिक अभियान शिवराज नगर समितिका कलाकारले गीत र नृत्य प्रस्तुत गर्नुभएको थियो ।
खरेन्द्रपुरको कोणसभाको सञ्चालन राजमो कपिलवस्तुका सल्लाहकार चेतनारायण खनालले र समितिचोकको कार्यक्रमको सञ्चालन
रक्तिमका कपिलवस्तुका अध्यक्ष बेगम बुढामगरले गर्नु भएको थियो ।
खरेन्द्रपुरको कार्यक्रमअघि व्यापारी, बुद्धिजीवीसँग भेटघाट कार्यक्रम सम्पन्न गरिएको थियो ।
