काठमाडौँ । सत्तारुढ दुई दल नेकपा (एमाले) र नेपाली कांग्रेसबीच तनाव बढ्दै गएको छ । पछिल्लो समय तनावको कारण बनेका छन्, प्रधानमन्त्री केपी शर्मा ओली निकटका सांसद सूर्य थापा ।
प्युठानबाट प्रतिनिधि सभामा निर्वाचित सांसद थापाको गतिविधिलाई लिएर कांग्रस प्युठानले विज्ञप्ति नै निकालेर आपत्ति जनाएको छ ।
कांग्रेसको विज्ञप्तिप्रति आपत्ति जनाउँदै एमालेले पनि विज्ञप्ति जारी गरेको छ । र, दुई पार्टीका नेता कार्यकर्ताहरूबीच सामाजिक सञ्जालमा दोहोरी चलेको छ ।
सांसद थापाले गएको पुस ११ गते जिल्ला समन्वय समितिमा आयोजित सर्वदलीय तथा सर्वपक्षीय कार्यक्रममा कांग्रेसका समानुपातिका सांसदलाई लक्षित गर्दै ‘यी समानुपातिकहरूलाइ फुर्सदै फुर्सद छ। समानुपातिकलाई न कसैले जन गुनासो गर्दछन्, न यिनिहरुमा कुनै जिम्मेवारी छ न कुनै चुनाव जितेको अनुभव छ’ भन्ने अभिव्यक्ति दिएका थिए ।
खासमा कांग्रेसलाई आपत्ति लाग्ने कुरा चाहिँ लुम्बिनी प्रदेशका मन्त्री रोज राणाले जिल्लामा देखाएको फुर्तीप्रति लक्षित गर्दै थापाले ‘क्याटवाक गर्दै हिँडेर विकास हुन्छ ?’ भन्ने अभिव्यक्ति दिएपछि हो ।
दुई दलबीच तनाव बढ्दै जाँदा थापाले फागुन १ गते झिमरुक गाउँपालिका वडा न ५ मा भएको टेलिकम २जी/४जी सेवा विस्तारका क्रममा सासंद थापा र लुम्बिनी प्रदेश सासंद निमा गिरीले सयुंक्त उद्घाटन गर्ने भनी लेखिएको ब्यानर कार्यक्रम स्थलबाटै हटाउन लगाएका थिए ।
कांग्रेसका प्रदेश सांसदलाई आफू बराबर हैसियत दिएको भन्दै थापाले टेलिकमका कर्मचारीलाई धम्क्याएका थिए ।
फागुन २ गते जारी विज्ञप्तिमा कांग्रेस प्युठानले भनेको छ, ‘मा. सूर्यबहादुर थापाज्यू ‘प्यूठान जिल्लाका जनप्रतिनिधि गाउँ जाने वा आफ्ना मतदातालाइ भेट्ने र मतदातासँग के बोल्ने हो भन्ने कुरामा तपाइसँग अनुमति लिनुपर्ने हो ? हाल सत्ता साझेदारीमा रहेका दुइ ठुला दलको गठबन्धनको गरिमालाई विखण्डन गर्ने दुषित भनाईहरुलाई बन्द गर्न आग्रह गर्दछौँँ।’
यता, कांग्रेसको विज्ञप्तिविरुद्ध एमालेले फागुन ३ गते अर्को विज्ञप्ति जारी गरी ‘सार्वजनिक मन्तव्यको क्रममा अभिव्यक्त केही शब्दावलीहरुलाई विज्ञप्ती मार्फत विरोध गर्ने प्रवृत्ति नितान्त राजनीतिक संस्कारविहीन रहेको’ बताएको छ ।
एमाले प्युठानका अध्यक्ष विजय विराज विष्टद्वारा जारी विज्ञप्तिमा ‘जिल्ला समन्वय समिति प्यूठानमा राखिएको अर्न्तक्रिया कार्यक्रममा माननीय सूर्य थापा प्रमुख अतिथीको रुपमा आमन्त्रित भई कार्यक्रम स्थलमा पुग्दा समानुपातिक सांसद धनलक्ष्मी श्रेष्ठलाई प्रमुख अतिथीको रुपमा माइन्युटमा उपस्थिती गराइएको र सो माइन्युट पुनः लेखिएको विषयलाई राज्यको मर्यादाक्रम नबुझेजस्तो गरी माईन्युट च्यातेको वा च्यात्न लगाइएको जस्तो भ्रम उत्पन्न हुने गरि विज्ञप्ती मार्फत सम्प्रेषण गर्न खोज्नु नितान्त अनुचित र अनैतिक छ’ भनिएको छ ।
एमालेले ‘टेलिफोन टावर उद्घाटनको विषयमा प्रतिनिधि सभा सदस्यको अपमान हुने गरी प्रदेश सभा समानुपातिक सदस्यकै मर्यादाक्रममा राख्न खोज्ने प्रवृत्तिलाई सच्चाइएको विषयलाई अन्यथा लिनु घोर आपत्तिजनक रहेको’ पनि विज्ञप्तिमा उल्लेख छ ।
कांग्रेस र एमालेको विज्ञप्तिपछि दुवै दलका कार्यकर्ताले एक आपसमा घोचपेच गर्दै सामाजिक सञ्जाल तताएका छन् ।
दुवै पार्टीका नेता कार्यकर्ताले एक आपसमा हिलो छ्यापाछ्याप गरिरहेका छन् ।
तर, स्वतन्त्र मतदाताहरू भने दुवै पार्टीले जनताको पक्षमा काम गर्न नसकेर एक आसपमा आरोप प्रत्यारोप गरिरहेको भन्दै आलोचना गरिरहेका छन् ।
