काठमाडौं । प्रधानमन्त्री केपी शर्मा ओलीले कोरोना नियन्त्रणका लागि सुरुवाती दिनमा अलमल भएपनि अहिले सरकारले चालेका कदमहरु सफल भएको बताउनुभएको छ । सोमबार साँझ राष्ट्रका नाममा सम्बोधन गर्दै प्रधानमन्त्री ओलीले लक डाउन, अन्तर्राष्ट्रिय सीमा नाका र उडानहरु बन्द गर्ने निर्णयले डरलाग्दो क्षतिबाट मुलुकलाई जोगाएको बताउनुभयो ।
कोरोना संक्रमण देखिएका २ महिने शिशु र ८१ वर्षिया बृद्धा निको हुनुलाई प्रधानमन्त्रीले आफ्नो उपलब्धीका रुपमा लिनुभएको छ । दक्षिण एसियामा नेपालको अवस्था सन्तोषजनक रहेको उल्लेख गर्दै प्रधानमन्त्री ओलीले कोरोना विरुद्धको लडाइ अझै चुनौतीपूर्ण रहेको बताउनुभयो ।
उहाँले कम्तिमा पनि २ प्रतिशत जनसंख्याको कोरोना परीक्षण गर्ने योजना सरकराले बनाएको पनि बताउनुभएको छ । परीक्षण किट र औषधिको प्रवन्ध द्रुत गतिमा विस्तार गरी अझै यसलाई उन्नत बनाइने उहाँले बताउनुभयो प्रधानमन्त्री ओलीले अपाङ्गता भएका व्यक्ति वा अन्य कुनै पनि पनि सामाजिक सहायता रकम कटौती नहुने बताउनुभएको छ ।
सोमबार साँझ राष्ट्रका नाममा सम्बोधन गर्दै प्रधानमन्त्री ओलीले सामाजिक सुरक्षाको दायरा फराकिलो पारिने बताउनुभयो । योगदानमा आधारिक सामाजिक सुरक्षा प्रणालीलाई परिमार्जन गर्दै सबै श्रमिकहरुको सामाजिक सुरक्षा कोषमा गर्नुपर्ने योगदान रकम तत्काल सरकारी कोषबाटै मिलान गरिने उहाँले बताउँनुभयो ।
प्रधानमन्त्री ओलीले प्राकृतिक विपत्ति न्यूनीकरण तथा समस्या समाधान कोष र प्राकृतिक विपत्ति राहत कोषमा रहेका रकम कोरोना संक्रमण रोकथाम, नियन्त्रण तथा उपचार कोषमा हस्तान्तरण गरिने पनि बताउनुभएको छ ।
प्रधानमन्त्री अोलीले कोरोनासँग जुध्न स्थानीय तहमा स्वास्थ्य सुरक्षा, स्वास्थ्य सेवा आधारवस्तुहरुको आपूर्तिका कामहरु प्रभावकारी बनाइने बताउनुभयो । अझै क्वारेन्टाइनका संख्या बृद्धि गरेर त्यसको स्तर सुधार गरिने उहाँले बताउनुभयो । होटल र सार्वजनिक स्थानहरुलाई समेत क्वारेन्टाइनस्थलको रुपमा प्रयोग गर्ने विषयमा सरकारले योजना बनाएको उहाँले बताउनुभयो ।
प्रधानमन्त्री ओलीले विदेशबाट फर्किनुपर्ने अवस्थामा रहेका नेपालीहरुलाई स्वदेश फर्काने व्यवस्थाका लागि सरकारले योजना बनाइरहेको बताउनुभयो । जुनसुकै मुलुकमा रहेका नेपालीहरुलाई पनि सरकारले समयमै उद्धार गर्ने कुरामा निश्चिन्त रहन उहाँले आग्रह गर्नुभयो । भारतीय सीमा क्षेत्रबाट आउने नेपालीहरु परीक्षण बिना नै स्वदेश फर्किरहेको उल्ले गर्दै उहाँले नियमको पालना नगर्दा र परीक्षण बिना नै भित्रिदा महामारी फैलिन मद्दत गरेको बताउनुभयो ।
महामारीका कारण स्थगित भएको माध्यमिक शिक्षा परीक्षा (एसइइ) स्थगित भएपछि विद्यार्थीहरु अन्यौलमा रहेको उल्लेख गर्दै उहाँले शैक्षिक वर्ष खेर जान नदिन शिक्षा मन्त्रालयले छिट्टै प्रवन्ध मिलाउने बताउनुभयो । सरकाराको नीति तथा कार्यक्रममा जोड दिएअनुसार खेतीपातीको याम खेर जान नदिन सामाजिक दुरी कायम गरी कृषि कार्य अगाडी बढाइने उहाँले बताउनुभयो ।
