काठमाडौँ । पाथीभरा केबलकार विरुद्ध नो केबलकार समूहद्वारा आन्दोलनको कार्यक्रम घोषणा गरिएको छ ।
सरकारका सहसचिवस्तरीय वार्ताबाट समस्या समाधान नभएको भन्दै उनीहरूले २०८१ माघ २८ गते मङ्गलबार थप आन्दोलनका कार्यक्रम घोषणा गरेका हुन् ।
उनीहरूले फागुन ६ गतेदेखि ८ गतेसम्म “मुक्कुमलुङ बचाऔँ पदयात्रा” गर्ने, केबलकार अनुमति तथा सम्झौता खारेजीका लागि फुङलिङ नगरपालिका घेराउ गर्ने, काठमाडौँ, इटहरी र बिर्तामोडमा केबलकार विरुद्ध विरोधसभा गर्नेलगायत कार्यक्रम घोषणा गरेका छन् ।
सरकारसँग यसअघि माघ २२ गते भएको ६ बुँदे सहमति कार्यान्वयनमा सरकार इमानदार नभएको उनीहरूको दाबी छ ।
उनहिरूको आरोप छ– सरकारले वार्ताका लागि न्यूनतम वातावरण बनाउन सकेन । निर्णायक वार्ता समिति बनाउन सरकार इच्छुक देखिएन ।
माघ २२ गते भएको वार्ताअनुसार माघ २७ गते दुवै पक्षबिच विस्तृत वार्ता गर्ने सहमति भएको थियो तर सहमतिबमोजिम आफूहरू मन्त्री वा उच्चस्तरीय टोलीसँग मात्रै वार्ता गर्ने भन्दै उनीहरूले हिँडेपछि छलफल स्थगित भएको थियो ।
