काठमाडौँ । अमेरिकी अन्तर्राष्ट्रिय विकास एजेन्सी (युएसएड) अन्तर्गत स्वास्थ्य क्षेत्रको सरकारी संयन्त्रमा मात्रै ७२ करोड ४४ लाख रुपैयाँ कार्यक्रम रहेकोमा सो परियोजना रोकिने देखिएको छ ।
पुनः निर्वाचित अमेरिकी राष्ट्रपति डोनाल्ड ट्रम्प प्रशासनले युएसएडका कार्यक्रम रोक्दा स्वास्थ्य तथा जनसङ्ख्या मन्त्रालय र त्यस मातहतका ५२ करोड २४ लाख ४० हजार रुपैयाँ र प्रदेशको १५ करोड र स्थानीय तहको पाँच करोड रकम रोकिन पुगेको हो ।
रकम रोकिएपछि स्वास्थ्यका कार्यक्रम प्रभावित हुने बताइएको छ । सबैभन्दा धेरै परिवार कल्याणअन्तर्गतका कार्यक्रम प्रभावित हुने मन्त्रालयका कर्मचारीको दाबी छ । परिवार कल्याणअन्तर्गत १४ करोड ८० लाख रुपैयाँ बजेट आउने निश्चित थियो । उक्त बजेटबाट परिवार कल्याणअन्तर्गत विभिन्न ३५ ओटा कार्यक्रम हुने भएको थियो ।
त्यस्तै, स्वास्थ्य व्यवस्थापन कार्यक्रमअन्तर्गत १३ करोड ६५ लाख रुपैयाँ रकम रोकिएको छ । स्वास्थ्य व्यवस्थापनअन्तर्गत विभिन्न ४४ ओटा कार्यक्रम रहेका छन् ।
त्यसैगरी, महामारी नियन्त्रण विषयको छ करोड ९० लाख रुपैयाँ, स्वास्थ्य क्षेत्र सुधार कार्यक्रमको तीन करोड १७ लाख, प्रसूतिगृहमा मिल्क बैङ्क स्थापना तथा सञ्चालनका लागि एक करोड ५१ लाख रुपैयाँ, राष्ट्रिय स्वास्थ्य शिक्षा तथा सूचना केन्द्रको तीन करोड ५० लाख रुपैयाँ, राष्ट्रिय स्वास्थ्य तालिम केन्द्रको चार करोड छ लाख रुपैयाँ रोकिएको मन्त्रालयले जानकारी दिएको छ ।
त्यसैगरी, नर्सिङ तथा सामाजिक सुरक्षा सेवा कार्यक्रमको चार करोड ४६ लाख रुपैयाँ र उपचारात्मक सेवा कार्यक्रमको ४९ लाख रुपैयाँ रोकिएको स्वास्थ्य मन्त्रालयले जनाएको छ ।
