काठमाडौँ । काठमाडौँको बूढानीलकण्ठ नगरपालिका–१० बालुवाखानीस्थित
फेरिल्यान्ड इन्टरनेसनल स्कुलले प्रथम फेरिल्यान्ड अन्तरविद्यालय बास्केटबल प्रतियोगिताको महिलातर्फको उपाधि जितेको छ।
फेरिल्यान्डले जुनियर गर्ल्सतर्फको उपाधि जित्दा किङडम हिमालयन जुनियर ब्वाइजतर्फ च्याम्पियन बन्यो ।
बालुवाखानीस्थित आयोजकको कोर्टमा भएको जुनियर ब्वाइज फाइनलमा किङडमले न्युटनलाई ३५–२५ ले पराजित गर्यो । किङडमका प्रवेश लामाले १६ अंक जोडे । कुनैपनि विधामा किङडमको हालसम्मकै पहिलो उपाधि हो । ग्रिनल्यान्ड तेश्रो भयो ।
जुनियर गर्ल्सको उपाधि भिडन्तमा फेरिल्यान्डले बौद्ध चिल्ड्रेन हेभेनलाई २७–१० ले हरायो । फेरिल्यान्डकी करुणा बोगटीले १२ अंक जोडिन् ।
९ दिनको अन्तरालमा फेरिल्यान्डको यो दोश्रो उपाधि हो । फेरिल्यान्डले माघ १८ प्रथम ज्ञान संस्कार अन्तरविद्यालय बास्केटबल प्रतियोगितामा जुनियर गर्ल्सकै उपाधि जितेको थियो । न्युटन तेस्रो भयो ।
जुनियर ब्वाइजमा किङडमका अच्युत तामाङ तथा जुनियर गर्ल्समा फेरिल्यान्डकी रणुका तामाङ ‘मोस्ट भेलुएबल प्लेयर’ घोषित भए । जुनियर ब्वाइजमा न्युटनका आशिष राई तथा जुनियर गल्र्समा बौद्ध चिल्ड्रेन हेभेनकी जस्मिन गुरुङ प्रतियोगिताकै सर्वाधिक स्कोरकर्ता बने ।
जुनियर ब्वाइजमा ग्रिनल्यान्डका विश्वास केसी तथा जुनियर गर्ल्समा न्युटनकी आईरिन राना उत्कृष्ट ‘थ्री प्वाइन्टर’ चुनिए । जुनियर ब्वाइजमा गुरुकुल पब्लिक र जुनियर गर्ल्समा मन्जरी ‘इमर्जिङ टिम’ ठहरिए ।
विजेतालाई बूढानीलकण्ठ नगरपालिकाका मेयर मिठाराम अधिकारी, उप मेयर अनिता लामा, बूढानीलकण्ठ शिक्षा महाशाखाका प्रमुख ललितविक्रम सिंह, काठमाडौं प्याब्सनका वरिष्ठ उपाध्यक्ष सुदर्शन थापा, फेरिल्यान्डका संस्थापक प्रिन्सिपल विष्णुचन्द्र अधिकारी, फेरिल्यान्डका संस्थापक निर्देशकत्रय रामप्रसाद गौतम, विनोद अधिकारी र राजेन्द्र देवकोटाले एक कार्यक्रमबीच पुरस्कृत गरे ।
साताव्यापी प्रतियोगिताको जुनियर ब्वाइज र जुनियर गर्ल्समा समान १२–१२ गरी २४ टिम सहभागी थिए ।
