काठमाडौँ । त्रिभुवन विश्वविद्यालयले क्रियाशील विद्यार्थी सङ्गठनमाझ अन्तरक्रिया कार्यक्रम सम्पन्न गरेको छ ।
अखिल (छैठौं), अनेरास्ववियु, नेपाल विद्यार्थी सङ्घ, अखिल (क्रान्तिकारी) लगायत १८ विद्यार्थी सङ्गठनको उपस्थितिमाझ २०८१ माघ २५ गते शुक्रबार सो कार्यक्रम सम्पन्न भएको हो ।
कार्यक्रममा अखिल (छैठौं) को तर्फबाट अध्यक्ष सुवाश जिसीले मन्तव्य राख्दै स्वतन्त्र विद्यार्थी युनियन निर्वाचनको सुनिश्चितता गर्न त्रिभुवन विश्वविद्यालय र ठुला विद्यार्थी सङ्गठनको गम्भीर ध्यानाकर्षण गराउनुभयो ।
त्रिविले नै तोकिएको मितिमा निर्वाचन गराउन ढिलासुस्ती गर्ने गरेको र ठुला विद्यार्थी सङ्गठनका अनुशासनहीन गतिविधिका कारण पनि निर्वाचन स्थगित हुने स्थिति सृजना भएको उहाँको आरोप थियो ।
‘म अखिल (छैठौं) को तर्फबाट त्यसतर्फ ध्यान दिन आग्रह गर्दछु’ जिसीले भन्नुभयो– ‘सम्बन्धित विद्यार्थी सङ्गठनभित्रको अनुशासनलाई व्यवस्थित गरी निर्वाचनको सुनिश्चितता गर्न सबै सङ्गठनको एक्यबद्धता पति आवश्यक छ ।’
मन्तव्यको क्रममा उहाँले विश्वविद्यालय र कलेजमा विद्यार्थी सङ्गठनका कारण राजनीति भयो भन्ने आरोप निराधार रहेको उहाँको भनाइ थियो ।
‘बरु विश्वविद्यालय प्रशासनमा गम्भीर र भ्रष्ट राजनैतिक चलखेल हुने र त्यसको विरुद्धमा विद्यार्थी सङ्गठन लाग्दा राजनीति भयो भनेर विद्यार्थी सङ्गठनलाई नै आरोप लगाउने कार्य अत्यन्तै लज्जास्पद र हास्यास्पद छ’ उहाँको भनाइ थियो ।
अध्यक्ष जिसीले स्ववियुको भूमिकालाई सशक्त बनाउनुपर्ने, आर्थिक पारदर्शिता कायम गर्नुपर्नेलगायतका सुझाव त्रिवि प्रशासनसमक्ष राख्नुभयो ।
उपकुलपति प्राडा केशरजङ्ग बरालमा सम्पन्न सो कार्यक्रममा रजिस्ट्रार केदारप्रसाद रिजाल, विद्यार्थी कल्याण तथा खेलकुद निर्देशनालयका निर्देशक पशुपति अधिकारीको उपस्थिति रहेको थियो ।
कार्यक्रमको अध्यक्षता शिक्षाध्यक्ष प्राडा खड्क केसीले गर्नुभएको थियो ।
