काठमाडौं । अखिल नेपाल ट्रेड यूनियन महासंघ (अन्टुक)को कार्यवहाक अध्यक्षमा लोकराज भुसाल चयन हुनुभएको छ ।
यही जेष्ठ ७ गते बसेको अन्टुकको केन्द्रीय सचिवालय बैठकले भुसाललाई काबा अध्यक्ष चयन गरेको नवनियुक्त अध्यक्ष भुसालद्वारा आइतबार जारी विज्ञप्तिमा जनाइएको छ ।
यस्तै, बैठकले प्रथम उपाध्यक्ष सालिकराम सापकोटालाई कार्यवाहक महासचिवमा चयन गरेको छ ।
यस्तो छ, विज्ञप्ति,
‘यही जेष्ठ ७ गते अखिल नेपाल ट्रेड यूनियन महासंघ (अन्टुक)को केन्द्रीय सचिवालयको बैठक भयो । त्यसका प्रथम उपाध्यक्ष सालिकराम सापकोटाको अध्यक्षतामा बसेको त्यो आकस्मिक बैठकले त्यसका कतिपय पदाधिकारीहरुबारे महत्वपूर्ण निर्णय गरेको छ ।
त्यसका पूर्व अध्यक्ष नारायण सापकोटा कतिपय व्यवहारिक कारणले पदबाट हट्नुभएको हुनाले त्यो पदपूर्तिको लागि त्यो बैठक बसेको थियो ।
बैठकले त्यसका महासचिव लोकराज भूसाललाई कार्यवाहक अध्यक्ष र प्रथम उपाध्यक्ष सालिकराम सापकोटालाई कार्यवाहक महासचिवमा चयन गरेको छ । पछि त्यसको केन्द्रीय समितिको बैठकले स्थायी रुपमा ती पदहरुको पूर्तिका लागि आवश्यक निर्णय गर्नेछ ।
अहिले कोभिड १९ का कारणले विश्वव्यापी रुपमा नै संकटको स्थिति उत्पन्न भएको छ भने, नेपालमा पनि त्यसले ठूलो असर पारेको छ । देशमा त्यसको संक्रमण दिनदिनै झन्झन् बढ्दै र गम्भीर हुँदै गइरहेको छ । त्यस प्रकारको अवस्थामा एकातिर सरकारसित त्यो महामारीको नियन्त्रण र उपचार तथा अर्कातिर जनतालाई राहत र आवश्यक व्यवस्था मिलाउनको लागि समेत हामीले माग गर्दछौं ।
यो स्थितिमा कोभिड १९ को प्रकोपबाट बच्न जनताले पनि उच्च सतर्कता अपनाउनुपर्ने आवश्यकतामा हामीले विशेष जोड दिन्छौं ।’
