काठमाडौँ । नेकपा (मसाल) ले सामाजिक सञ्जाल नियमन गर्ने नाममा ल्याएको विधेकको विरोध गरेको छ ।
सामाजिक सञ्जाललाई नियमन गर्न आवश्यक रहे पनि प्रेस स्वतन्त्रतामाथि नै प्रतिबन्ध लगाउने कैयौँ विषय सामेल गरिएको भन्दै मसालले विरोध गरेको हो ।
प्रवक्ता रामप्रकाश पुरीको हस्ताक्षरमा २०८१ माघ २१ गते सोमबार प्रेसवक्तव्य जारी गर्दै पार्टीले यो विधेयकमार्फत सरकारले राज्यशक्तिको दुरुपयोग बढाएर लैजान सक्ने आशङ्का व्यक्त गरेको छ ।
वक्तव्यमा प्रेस स्वतन्त्रता तथा जनताको मौलिक अधिकारको सुरक्षा हुने गरी कानुन निर्माण हुनुपर्नेमा जोड दिएको छ ।
त्यस्तै, वक्तव्यमा पाथीभरा केबलकार निर्माण विवादमा केबलकार निर्माण हुनुपर्ने तर त्यस क्रममा स्थानीय जनताको संस्कृतिको संरक्षणमा ध्यान दिनुपर्ने बताएको छ ।
केबलकारको स्टेसन मन्दिरभन्दा केही दुरीमा हुनुपर्ने तर त्यो विषय दुरी स्थानीय जनता र केबलकार सञ्चालकको सहमतिमा तय गरिनुपर्ने मसालको मत छ ।
यस्तो छ प्रेसवक्तव्यको पूर्ण पाठ :
“सामाजिक सञ्जालको सञ्चालन, प्रयोग तथा नियमन गर्ने सम्बन्धमा व्यवस्था गर्न बनेको विधेयकप्रति हाम्रो पार्टीको गम्भीर ध्यान आकर्षित भएको छ । हाम्रो स्पष्ट धारणा छ कि सामाजिक सञ्जालको दुरुपयोग गरेर व्यक्तिको चरित्रहत्या गर्ने, गालीगलौज गर्ने, व्यक्तिगत गोपनीयतालाई भङ्ग गरिदिने, छाडा र अश्लील क्रियाकलाप सम्प्रेषण गर्नेजस्ता क्रियाकलापमाथि नियन्त्रण र नियमन गरिनुपर्ने आवश्यकता छ तर त्यसलाई नियन्त्रण र नियमन गर्नेभन्दा पनि प्रेस स्वतन्त्रतामाथि नै प्रतिबन्ध लगाउने प्रकारका कैयौँ विषय यस विधेयकमा समावेश रहेका छन् । विधेयकले ‘वर्ग’ लगायत कतिपय सामाजिक र राजनीतिक विसङ्गतिको विरुद्ध विरोध गर्न पाउने प्रेस स्वतन्त्रतालाई नियन्त्रण गर्न खोजेको र कतिपय द्विअर्थी लाग्ने प्रावधानले राज्यशक्तिको दुरुपयोगलाई बढाएर लैजाने स्पष्ट छ । यस प्रकारको अवस्थामा हाम्रो पार्टीले त्यस प्रकारको विधेयकको विरोध गर्दछ र प्रेस स्वतन्त्रता एवम् जनताको मौलिक अधिकारको सुरक्षा हुने गरी कानुन निर्माण हुनुपर्नेमा जोड दिन्छ ।
पाथीभरामा केबुल सञ्चालनसम्बन्धी भइरहेको विवादप्रति पनि हाम्रो पार्टीको गम्भीर ध्यान आकर्षित भएको छ । विकासकार्यलाई वृद्धि गरेर लैजानुपर्ने कुरालाई हामीले सही मान्दछौँ र त्यस प्रकारको कार्यलाई पर्यटन विशेष स्थलमा पनि सुदृढ गरेर लैजानुपर्दछ । संसारभरि महत्त्वपूर्ण स्थान, धार्मिक वा पर्यटकीय स्थलमा केबुलकार वा सडक सुविधाको व्यवस्था गर्ने प्रचलन रहँदै आएको छ । त्यसैले पाथीभरामा केबुलकार सञ्चालनमा ल्याउने कार्यलाई हामीले गलत मान्दैनौँ तर त्यसका साथै अर्को पक्षतर्फ पनि हाम्रो ध्यान छ कि त्यहाँका जनताको संस्कृतिको संरक्षण, सम्बर्द्धन र विकासको पक्षलाई पनि राज्यले गम्भीर रूपले सम्बोधन गर्नुपर्दछ । त्यसरी त्यहाँ विकासको कार्य र जनताको संस्कृति तथा सभ्यताको संरक्षणको बिचमा सही र उपयुक्त योजना बनाउनुपर्नेमा राज्यको गम्भीर ध्यान जानुपर्दछ भन्ने हाम्रो दृढ मत रहेको छ । यसका साथै पाथीभरामा केबुलकारको स्टेसन धार्मिक स्थलभन्दा केही दुरीमा टाढा हुनु अनिवार्य छ र त्यो कति दुरीमा हुने भन्ने कुरा त्यहाँका जनता र केबुलकार सञ्चालकको आपसी सहमति र सल्लाहबाट निश्चित गरिनुपर्नेमा हामीले जोड दिन्छौँ ।”
